Ստամբուլի հայ համայնքն էլիտար բնակարանների կառուցման նախագծի ավարտով խիզախել է մտնել Ստամբուլի անշարժ գույքի՝ վերելք ապրող սեկտոր. նախագծի հիմքը դեռևս 4 տարի առաջ դրվել էր Մեսրոպ 2-րդ հայրապետի կողմից։ Այս մասին հայտնում է Hurriyet Daily News–ը։
Նախագիծը, որն իրականացվել է 11,250 ակր հողի վրա և նայում է Բոսֆորին, ամենամեծ հողատարածքն է, որը պատկանում է Ստամբուլի հայ համայնքին։
Օրթաքյոյի Սբ. Աստվածածին հայկական եկեղեցու հիմնադրամը այդ հողատարածքը փոխանցել էր Lotus Evleri էլիտար շենքերի կառուցմամբ զբաղվող կազմակերպությանը՝ կառուցվող բնակարանների մի մասի դիմաց։
Lotus Evleri–ն շուրջ 200 բնակարանի կառուցումն ավարտել էր անցած տարի, իսկ բնակիչները որոշ ժամանակ է, ինչ տեղափոխվել են այդ բնակարաններ։
Հիմնադրամի նախագահ Իսքանդար Սահինգյոզը թերթին պատմել է, որ այդ հողատարածքը ազգային անվտանգության նկատառումներով 1973թ. վերցվել է Թուրքիայի Գանձարանի կողմից՝ Բոսֆորի կամուրջը կառուցելուց անմիջապես հետո։ Այնուհետև այդ հողատարածքը հատկացվել է Թուրքիայի պաշտպանության նախարարությանը։
1996 թ., սակայն, հիմնադրամը պետության դեմ հայց է ներկայացրել և հողատարածքը ետ ստացել. «Այս դեպքն առաջինն էր փոքրամասնությունների հիմնադրամների պատմության մեջ»,– նշել է Սահինգյոզը։
«Մենք նախկինում հնարավորություն չունեինք մեր գումարն օգտագործել այնպես, ինչպես ցանկանում էինք։ Այժմ մենք կարող ենք տնօրինել դրանք ըստ մեր ցանկության։ Փոքրամասնությունների հիմնադրամների վրա տարածվող նոր կանոնակարգումները, թեև ոչ բավարար,այդուհանդերձ, ապագայի հանդեպ հույս են ներշնչում»,– նշել է Սահինգյոզը։
Նա չի նշել,թե հիմնադրամը քանի բնակարան է ստացել այդ հողատարածքի դիմաց, սակայն հայտնել է, որ ստացված շահույթը կօգտագործվի հիմնադրամին պատկանող Թարգմանչաց դպրոցի և եկեղեցու ծախսերը հոգալու, ինչպես նաև՝ նոր ներդրումներ իրականացնելու համար։
Tert.am
15.12.10
Leave a Reply