Երեւանում դեկտեմբերի 14-ին մեկնարկել է միջազգային խորհրդաժողով` նվիրված ցեղասպանության, մասնավորապես Օսմանյան կայսրությունում Հայոց ցեղասպանության հարցերին: Խորհրդաժողովին մասնակցում են փորձագետներ եւ գիտնականներ տարբեր երկրներից` Եվրոպայից, Թուրքիայից եւ Իսրայելից:
Բացելով խորհրդաժողովը` Հայաստանի նախագահ Սերժ Սարգսյանը, մասնավորապես, ասել է. «Այսօր, ավելի քան երբեւէ, անհրաժեշտություն կա գործուն միջոցներ մշակել ցեղասպանությունների կանխման ուղղությամբ: Միջազգային մեխանիզմների բացակայությունը, տարբեր վարչակազմերի կողմից ցեղասպանությունների ժխտումը, անպատժելիությունը եւ անտարբերությունը դրանց նկատմամբ հանգեցնում են նման հանցագործությունների կրկնության վտանգի»:
Հայաստանի նախագահը կարծիք է հայտնել, որ հաճախ քաղաքական կոնյունկտուրան եւ շահերը գերակա են դառնում ցեղասպանությունների ճանաչման արդար ձգտման նկատմամբ: Այսօր միջազգային հանրությունը պիտի կամք դրսեւորի` ցեղասպանությունների ճանաչման եւ դատապարտման ուղղությամբ: «Սակայն ներկայում մենք բախվում ենք այնպիսի մի երեւույթի հետ, ինչպիսին նոր կեղծված պատմության ստեղծումն է, որում տարբեր վարչակազմեր փորձում են ապացուցել իրենց ժողովուրդների հետ իբր տեղի ուենցած ցեղասպանությունների փաստը: Նրանց թվում է, թե կարող են իրենց հորինված պատմությունը փաթաթել միջազգային հանրությանը: Բայց նման դրսեւորումը հայրենասիրություն չէ: Սեփական մեղքը թաքցնելու փորձը նոր հանցագործություն է»,- ասել է Հայաստանի նախագահը:
Սերժ Սարգսյանը նշել է նաեւ, որ ցեղասպանությունները քաղաքական անհանդուրժողականություն են ծնում որոշ ռեժիմների կողմից, եւ համոզմունք է հայտնել, թե նման խորհրդաժողովները կօգնեն քաղաքական լուծումներ գտնել ցեղասպանությունների կանխման հարցում:
Այս միջոցառումները կարեւոր են ցեղասպանությունների իրավական հետեւանքների հայեցակարգերի մշակման համար:
«Մենք շարունակելու ենք բարձրաձայնել Հայոց ցեղասպանության հարցը, որ կանխենք նման հանցագործությունների կրկնությունը»,- ասել է Սարգսյանը:
Դեկտեմբեր 14, 2010 | 11:56
Leave a Reply