Այսօրվա Ստամբուլի համար ճարտարապետության տեսանկյունից թուրքերը պարտական են հայ ճարտարապետներին։ Այս մասին է գրում թուրքական Radikal օրաթերթի հոդվածագիր Չենգիզ Չանդարը՝ անդրադառնալով հայ ժողովրդի տաղանդավոր զավակների՝ Ստամբուլն աշխարհի ամենագեղեցիկ քաղաքներից մեկը դարձնելու գործում ունեցած անգերագնահատելի ներդրմանը։
«Ստամբուլը, անխոս, աշխարհի ամենագեղեցիկ քաղաքներից մեկն է։ Ստամբուլի առանձնահատկություններից մեկն Աստծո կողմից շնորհված աշխարհագրական դիրքն է։ Այն միակ քաղաքն է, որի միջով ծով է անցնում։ Սակայն Ստամբուլին այլ գեղեցկություն են հաղորդում նրա ճարտարապետական հիասքանչ կառույցները»,– գրում է Ջենգիզ Չանդարը «Չլինեին հայերը, կլինե՞ր արդյոք Ստամբուլը» վերնագրով հոդվածում։
Թուրք հոդվածագիրն իր հրապարակման մեջ մասնավորապես անդրադառնում է Պալյան գերդաստանի՝ Ստամբուլի ճարտարապետական ժառանգության մեջ թողած «անջնջելի» հետքին՝ մեկ առ մեկ թվարկելով այդ ընտանիքի ներկայացուցիչների կառուցած շինությունները։
Հոդվածագիրն անդրադառնում է նաև հանրաճանաչ ճարտարապետ Սինան փաշային՝ նշելով, որ նա նույնպես հայկական ծագում ունի։
«Ստամբուլը Ստամբուլ դարձնելու գործում անգերագնահատելի է Անատոլիայի հայերի դերը, և մենք պետք է հարգանքով խոնարհվենք նրանց առջև՝ Սինանից մինչև Բալյաններ։ Հարկ է նաև, որ բոլորս մտածենք, թե ինչպես եղավ, որ 1915 թվականը մեր երկիրը տափաստանի վերածեց։ Պետք է հասկանանք, թե այդ կոտորածները, կուզեք «ցեղասպանություն», կուզեք՝ բռնություն կամ էլ «սուտ պատմություն», ինչպիսի չքավորություն բերեցին մեր երկրին»,– գրում է թուրք հոդվածագիրը։
Tert.am
10.12.10
Leave a Reply