«Մալաթիա Հայ» կազմակերպության նախագահը և ղեկավարներն այցելել են քաղաքապետ Չաքըրին

«Մալաթիայի բարեգործ հայերի մշակույթի և համերաշխության» կազմակերպության նախագահ Հարութ Քուրումլուն և վերոնշյալ կազմակերպության ղեկավարները այցելել են քաղաքապետ Ահմեդ Չաքըրին:

«Մալաթիա Հայ» (MalatyaHAY) կարճ անվամբ հայտնի «Մալաթիայի բարեգործ հայերի մշակույթի և համերաշխության» կազմակերպության նախագահ Հարութ Քուրումլուն վերոնշյալ կազմակերպության ղեկավարների հետ այցելել է քաղաքապետ Ահմեդ Չաքըրին:

Ըստ գլխավոր քարտուղար Քյոլեդավիթօղլուի` Մալաթիան սկսել է փոխվել…

Դեկտեմբերի 9-ին կայացած այցի ժամանակ ելույթ ունեցած «Մալաթիա Հայ» կազմակերպության գլխավոր քարտուղար Հոսրավ Քյոլեդավիթօղլուն նշեց, որ Մալաթիայում շատ լավ աշխատանքներ են իրականացվում, և որ Մալաթիայի քաղաքապետարանի կողմից կատարված աշխատանքների շնորհիվ քաղաքում փոփոխություններ են սկսվել:

Քյոլեդավութօղլուն ասաց նաև հետևյալը. «Մենք Մալաթիայի տեղաբնիկներն ենք: Ուզում ենք մեր հիմնած «Մալաթիայի բարեգործ հայերի մշակույթի և համերաշխության» կազմակերպության մասին տեղեկացնել Մալաթիայի ժողովրդին: Այդ նպատակով ենք այցերի գնում: Շնորհակալություն եմ հայտնում, որ ընդունեցիք մեզ»: 

Քաղաքապետ Չաքըրի խոսքերով` Մալաթիան բազմաթիվ քաղաքակրթությունների օրրան է…

Քաղաքապետ Ահմեդ Չաքըրն իր հերթին գոհունակություն արտահայտելով այս այցի կապակցությամբ` հայտնեց, որ Մալաթիան բազում քաղաքակրթությունների օրրան է եղել, և որ պատմականորեն եղել է այն քաղաքներից, որում միաժամանակ արտահայտված են բազմաթիվ մշակույթներ:

Քաղաքապետ Չաքըրը նշեց նաև հետևյալը. «Մեր Մալաթիայում կարևոր աշխատանքներ են կատարվել` քաղաքի պատմական դեմքը պահպանելու նպատակով: Վաքըֆներին պատկանող հուշարձանները գալիք սերունդներին պահպանված վիճակում փոխանցելու նպատակով պահպանման տակ են վերցվել և նորոգվում են: Մենք մեծ նշանակություն ենք տալիս քաղաքացիական-հասարակական կազմակերպությունների առաջարկներին: Ձեզ և ձեր կազմակերպությանը մաղթում եմ հաջողություն և բարեհաջող աշխատանքներ»:

Լուրը ներկայացնում ենք կրճատումներով

 09.12.2010

http://haberler.com/malatyahay-dernegi-baskani-ve-yoneticileri-baskan-2406025-haberi