Զանգվածային անկարգություններով ուղեկցված «Բեշիքթաշ»-«Բուրսասփոր» ֆուտբոլային խաղի ժամանակ Բուրսայից ժամանած երկրպագուների ֆաշիստական արտահայտությունները՝ ուղղված «Բեշիքթաշի» ամիգո (երկրպագուներին ոգեւորող) Ալեն Մարկարյանի դեմ, կատաղեցրել են «Բեշիքթաշի» երկրպագուներին, ովքեր պատրաստվում են դատական հայց ներկայացնել «Բուրսասփոր» ակումբի դեմ։
Թուրքական Haber1903 կայքը տեղեկացնում է, որ «Բուրսասփոր»-ի դեմ դատական հայց ներկայացնել ցանկացող խմբի անդամները նշել են, թե երկու տարի է, ինչ շարունակվում են «Բուրսափոր»-ի ֆաշիստական կարգախոսները։ «Նախորդ տարի նրանք նույնկերպ վարվեցին իրենց դաշտում հյուրընկալած «Դիարբեքիրսփոր»-ի նկատմամբ։ Մենք այս ֆաշիստական գործելակերպը չենք ընդունելու, գտնելու ենք ամենալավ փաստաբաններին եւ կանգնենք «Բեշիքթաշ»-ի թիկունքին»,-նշված է խմբի հայտարարության մեջ։
«Բեշիքթաշ» ակումբի երկրպագուների Çarşı խումբը քննադատել է Թուրքիայի ֆուտբոլի ֆեդերացիային՝ «Բուրսասփոր»-ին չպատժելու համար եւ հրավիրում խնդրով մտահոգված անձանց բողոքի ակցիայի՝ UEFA-ի գրասենյակի դիմաց։
Նշենք, որ դեկտեմբերի 5-ին «Բեշիթաշ»-«Բուրսասփոր» խաղի ժամանակ «Բուրսասփոր»-ի երկրպագուները, ցանկանալով վիրավորել «Բեշիքթաշ»-ի հայազգի ամիգո Ալեն Մարկարյանին, բղավել են. «Հայ շները պաշտպանում են «Բեշիքթաշ»-ին»։
Հիշեցնենք, որ Ալեն Մարկարյանը աշխարհում ֆուտբոլի երկրպագուների ամենահայտնի` Բեշիքթաշի Çarşı ակումբի ղեկավարն է, թուրքական ամենամեծ ֆուտբոլային տրիբունայի մարզասերների ղեկավարը, ամիգո (երկրպագուներին ոգեւորող եւ շոուն ղեկավարող) եւ սպորտային մեկնաբան։
Leave a Reply