Մուսուլմանական գերեզմանոցում քրիստոնյան տեղ չունի

Թուրքերն առարկեցին, և կանադացի դիվանագետի գերեզմանը տեղափոխվեց:

Գերմանական արմատներով կանադացի նախկին դիվանագետ Հանս Հիմմելբախը 6 տարի առաջ փոխադրվել է Մուղլայի Բոդրում գավառը: Այն բանից հետո, երբ Հիմմելբախը հոկտեմբեր ամսին արյան բարձր ճնշման պատճառով մահացել է այն հիվանդանոցում, ուր նրան տեղափոխել էին, ընտանիքը, իր կտակի համաձայն, գերմաներեն և թուրքերեն աղոթքների ուղեկցությամբ նրան թաղել է Թորբա գերեզմանատանը: Սակայն այն բանից հետո, երբ շրջապատը հակազդեցություն է ցուցաբերել՝ ասելով, թե ՙՄուսուլմանական գերեզմանատանը չի կարող քրիստոնյա թաղվել՚, Հիմմելբախի գերեզմանը տեղափոխվել է գերեզմանոցի մի մեկուսի անկյուն: Այն դեպքում, երբ հանգուցյալի ընտանիքը լռում էր շրջապատից եկած հակազդեցության և իր կրած ցավերի մասին, Բոդրումի բնակիչ Նուր Բանու Իշչանն արել է հետևյալ մեկնաբանությունը. ՙԵրբ լսեցի դրա մասին, անհավատալի շոկ ապրեցի: Այն հանգամանքը, որ այդ մարդուն հողի տակից հանել են ու այլ վայր տեղափոխել, ինձ անչափ վրդովեց: Բոլորս մարդ ենք: Անկախ նրանից, թե որ կրոնն ենք դավանում, Աստված մեկ է: Մահացած մի մարդու հանդեպ անհարգալից վերաբերմունք ցուցաբերելով` նրա դին փոխադրելու պատմությունը, անկեղծ ասած, հոգեկան ցավ պատճառեց ինձ՚:

Քաղաքապետարանը գործի է անցել՝ արտասահմանցիների համար առանձին գերեզմանոց բացելու համար: Բոդրումի քաղաքապետ Մեհմեդ Քոջադոնը հետևյալը հայտնեց այդ կապակցությամբ. ՙԹորբայի մոտակայքում գտնվող մի անտառում 150 դյում հողատարածք ենք ունենալու, որը դարձնելու ենք առանձին գերեզմանատուն, որպեսզի նման խնդիրներ այլևս չծագեն՚:

haberturk.com
09.12.2010