Անհետացել է Հրանտ Դինքի սպանության գործով լուրջ ինֆորմացիայի տիրապետող վկան

Թուրքիայում անհետացել է «Ակօս» շաբաթաթերթի խմբագրապետ Հրանտ Դինքի սպանության գործով անցնող վկաներից Էրհան Օզենը։

Թուրքական Hurriyet օրաթերթի փոխանցմամբ՝ բավականին լուրջ ինֆորմացիայի տիրապետող Օզենը, ով ավազակային հարձակման համար իր պատիժը կրում էր Ամասիայի բանտում, իսկ վերջերս տեղափոխվել էր Չորումի ոչ խիստ ռեժիմի բանտ, հատուկ թույլտվությամբ դուրս է եկել կալանավայրից և այլևս չի վերադարձել։

Ստամբուլի դատախազ Սելիմ Բերնա Աթալայն օրեր առաջ գրություն էր ուղարկել Չորումի բանտ, որպեսզի վերջինիս տնօրինությունը թույլ տա Էրհան Օզենին ներկա գտնվել Հրանտ Դինքի սպանության գործի հերթական դատալսմանը։ Սակայն բանտի ղեկավարությունը պատասխանել է դատախազի գրությանը՝ տեղեկացնելով, թե Էրհան Օզենը հատուկ թույլտվությամբ դուրս է եկել բանտից և մինչև հիմա չի վերադարձել։

Նշենք, որ 2010թ. մայիսի 10-ին Էրհան Օզենը որպես վկա մասնակցել էր Հրանտ Դինքի սպանության գործի հերթական դատական նիստին, որի ժամանակ Օզենը հայտարարել էր, որ ինքը 1997–2005թթ. աշխատել է JITEM–ում (թուրքական ժանդարմերիայի հետախուզության գաղտնի ստորաբաժանում) և հատուկ հրահանգով պարբերաբար լուսանկարել է «Ակօս»–ի խմբագրատան շրջակայքը։ Բացի այդ, նա նաև հայտարարել էր, որ JITEM–ի գործակալներ են եղել նաև Դինքի սպանության գլխավոր մեղադրյալներից Յասին Հայալը և Էրհան Թունջելը։

Օզենը՝ որպես վկա, մասնակցել էր նաև «Էրգենեքոն»–ի և Մալաթիայի «Զիրվե» հրատարակչատան սպանդի դատական նիստերին, որոնց ժամանակ նույնպես արել էր ապշեցուցիչ հայտարարություններ։

Tert.am

11:44 • 11.12.10