«Քրդերն անհանգստացնում են քրիստոնյաներին»

«The Economist» շաբաթաթերթը «Թուրքիան և կրոնական ազատությունը» վերնագրով վերլուծական հոդվածի առաջաբանում օգտագործել է նաև հետևյալ արտահայտությունը. «Եթե ոչ բոլորը, ապա ոմանք ցանկանում են բարելավել Թուրքիայում ապրող քրիստոնյաների վիճակը»:

Վերլուծական հոդվածում, որում տեղ է գտել նաև այն պնդումը, թե «Քաջապես հայտնի է, որ քրդական աշիրեթները խառնված են եղել օսմանցիների կողմից 1915 թ. մոտ մեկ միլիոն հայերի սպանությանը», նշվում է նաև, թե Թուրքիայի հարավ-արևելքում միայն «մի բուռ տեղացի առաջնորդներ են փորձում հաշտվել մի ժամանակ բարօրության մեջ ապրող քրիստոնյաների հետ»:

Այս համատեքստում շաբաթաթերթն ընթերցողների ուշադրությունն է հրավիրում այն բանի վրա, որ Դիարբեքիրի Սուրի քաղաքապետ Աբդուլլահ Դեմիրթաշը գումար և նյութեր է ապահովել շրջանի բնակիչ քրիստոնյաների հուշարձանների վերականգնման համար, բայց միաժամանակ հայտնում հետևյալը. «Սակայն հարևան Մարդին նահանգում քրդական աշիրեթները շարունակում են անհանգստացնել այստեղ մնացած մի բուռ քրիստոնյաներին: Հիմնական թիրախն էլ Մոր Գաբրիել ասորական վանքն է»:

«The Economist» շաբաթաթերթը մատնանշել է նաև, որ վանքի հողատարածքի առնչությամբ 5 դատական գործ է հարուցվել, որոնցից երկուսը` Չելեբի աշիրեթի հսկողության տակ գտնվող քուրդ գյուղացիների, իսկ մյուսները` կառավարության կողմից:

Շաբաթաթերթը, միաժամանակ հայտնելով, որ լուրեր են պտտվում, թե Միդյաթում և շրջակա տարածքներում բնակվող մոտ 2 հազար ասորիները տանջանքներ են կրել, գրել է նաև հետևյալը. «Միդյաթի բնակիչ ասորիների կրած տառապանքները հակասում են Արդարություն և զարգացում կուսակցության` քրիստոնյաների հանդեպ վերաբերմունքի բարելավմանն ուղղված ջանքերին»:

Շաբաթաթերթը նաև հիշեցրել է, որ ԵՄ-ի` Թուրքիային ներկայացրած գլխավոր պահանջների շարքում տեղ է գտել նաև ոչ մահմեդական փոքրամասնություններին ավելի մեծ ազատություններ շնորհելու պահանջը:

«The Economist» շաբաթաթերթը, ուշադրություն հրավիրելով նաև թուրքական կառավարության կողմից արված այնպիսի «մի շարք ժեստերի» վրա, ինչպիսիք են` Վանում գտնվող մի հայկական եկեղեցու վերականգնումը և վարչապետ Էրդողանի` քրստոնյաների հանդեպ վատ վերաբերմունք չցուցաբերելու մասին հրահանգը, գրել է նաև հետևյալը. «Դրանցից և ոչ մեկը տպավորություն չի գործում Մոր Գաբրիել վանքի պատասխանատու եպիսկոպոս Սամուել Աքթաշի վրա, որը խոստացել է դիմել Մարդու իրավունքների եվրոպական դատարան, և ով ասում է հետևյալ խոսքերը. «Այս անարդարությունների նկատմամբ լուռ մնացի, բայց այլևս այդպես չեմ վարվելու»:

Անկարա լրատվական գործակալություն

03.12.2010