Քյոռ Հակոբը Գում Գափուում

Գիտե՞ք` որոշ վայրեր կան, որոնք կարծես իրենց գտնված տեղի խորհրդանիշը լինեն: Բաց են մնում սերնդեսերունդ, բայց նրանց որակը չի ընկնում անցնող ժամանակի հետ: Արդեն իսկ հենց այդ առանձնահատկություններն են, որ նրանց խորհրդանիշ են դարձնում:

Այդպիսի վայրերից մեկն էլ ՙՔյոռ Հակոբ՚ գինետունն է, որը յոթանասուն տարուց ավելի Գում Գափուում սպասարկում է իր այցելուներին: Հակոբ Ինջիյանը գինետան գործն սկսել է եռեսնական թվականների վերջին: Իրականում ձկնորս է եղել և այս գործը ձեռնարկել է` իր բռնած ձկներով ապուր պատրաստելով և վաճառելով: Ապա Գում Գափուում մի փոքրիկ խանութ է գնել և այն դարձրել գինետուն: Անշուշտ, ձուկն այս գինետան պարտադիր ուտեստներից մեկն է, բայց այս վայրի հայտնի դառնալու մեջ մեծ դեր են խաղացել Հակոբի տիկնոջ` Մարթայի պատրաստած հայկական խորտիկները:  

Իսկ Հակոբ Ինջիյանին Քյոռ Հակոբ ասելու պատճառն այն է, որ իրապես էլ նրա մեկ աչքը կույր է եղել: Ուշագրավ է, որ նման դեպքերում մարդու ամենամեծ աջակիցը եղող նրա կնոջ աչքերից մեկն էլ է կույր եղել: Անգամ ասում են, թե այս զույգը մի կատու է ունեցել, որի աչքն էլ է կույր եղել: Հակոբ Ինջիյանը առանձնահատուկ մի մարդ է եղել: Շատ համեստ և ճաշակով է հագնվել: Երբ Հակոբ Ինջիյանը վախճանվել է, նրա գործն ստանձնել է որդին` Հայկոն: Երբ նա էլ է մահացել, գինետունը համատեղ աշխատեցրել են Հայկոյի կինը` Սիլվան, և որդին` Դանիելը: Արդեն երկար տարիներ է, ինչ մայր ու որդի ներկայացնում են ՙՔյոռ Հակոբը՚: Այս վայրը դեռ Գում Գափուի խորհրդանիշներից է և շարունակում է իր այցելուներին հյուրասիրել թուրքական և հայկական խոհանոցի ամենահամեղ խորտիկներով:

Կոտլետներով ճաշատեսակ (Ափյոն)

Անհրաժեշտ պարագաները.

• 500 գ կոտլետի միս
• 5 կտոր չոր հացի միջուկ
• 1 գլուխ միջին չափի սոխ
• 1 հատ ձվի դեղնուց
• 2 թեյի գդալ աղ
• 1 թեյի գդալ սև պղպեղ, քեմոն, յենիբահար կոչվող համեմունք
• Եթե ձեռքի տակ ունեք, 1 թեյի գդալ կոտլետի համեմունք
• 1 թեյի բաժակ ձեթ

Սոուսի համար

• 1 գլուխ միջին չափի սոխ
• 2 ճաշի գդալ ձեթ
• 4-5 գլուխ սխտոր
• 3-4 հատ կանաչ կծու տաքդեղ
• 1 թեյի գդալ աղ
• 1 ճաշի գդալ տոմատ
• Եթե ձեռքի տակ ունեք, 2-3 միջին չափի լոլիկ
• 2 ջրի բաժակ տաք ջուր

Պատրաստման եղանակը

Կոտլետի միսը և չոր հացի միջուկը լցրեք մի խորը ամանի մեջ: Սոխը քերիչով անցկացրեք, ջուրը թեթևակի քամելուց հետո ավելացրեք մսի վրա:  Ավելացրեք նաև ձվի դեղնուցը, աղը, պղպեղը, յենիբահար համեմունքը և քեմոնը: Եթե ձեռքի տակ ունեք, ավելացրեք նաև կոտլետի համեմունքը և մի լավ շաղախ հունցեք:

Կոտլետի շաղախից ընկույզի մեծությամբ մասեր առանձնացնելով` դրանք բռան մեջ տրորեք և թեթևակիորեն տափակացրեք: Ձեր պատրաստած կոտլետները տաքացրած ձեթի մեջ տապակելով` դրեք ամանի մեջ: Շատ մանր կտրատած սոխը և ձեթը լցրեք մի լայն կաթսայի մեջ և միջին ջերմության կրակի վրա 2-3 րոպե խառնելով` եփեք: Ավելացրեք մանր կտրատած տաքդեղը, աղացած սխտորը, տոմատը և եփեք ևս 2-3 րոպե:  

Ավելացրեք նաև լոլիկ և ջուր, ապա` եռացրեք: Կոտլետները շարեք եռացող սոուսի մեջ և կափարիչը փակեք: 10 րոպե եփելուց հետո վերցրեք կրակի վրայից և մատուցեք տաք վիճակում:

Սահրափ Սոսյալ

http://hurarsiv.hurriyet.com.tr/goster/ShowNew.aspx?id=16132955