Վան քաղաքից 10 կմ հեռավորության վրա գտնվող Յուքարը Բաքրաչլը գյուղում նոր մզկիթ են կառուցում, որպեսզի քանդեն հայտնի Վարագավանքի անմիջապես կողքին գտնվող մզկիթը: Գյուղացիների կողմից այս ամենը նախաձեռնելու նպատակն այն է, որ վերանորոգվող Վարագավանքի կողքին մզկիթ չլինի:
Թուրքական Hurriyet-ի փոխանցմամբ՝ գյուղապետը նշել է, թե սկզբում ինքը դեմ է եղել բնակիչների պահանջին՝ քանդել մզկիթը, սակայն կրոնական գործերի վարչությունից տեղեկացել է, թե անհրաժեշտության դեպքում կարելի է մզկիթը քանդել։
Նոր մզկիթի կառուցումը կավարտվի 2012-ին, որից հետո կքանդվի Վարագավանքի հարեւանությամբ գտնվող հին մզկիթը։
Նշենք, որ NEWS.am-ի թղթակիցը այս հարցով հենց Յուքարըբաքրաչլը գյուղում զրուցել է տեղի իմամ Մեհմեդ Չոբանի հետ, ով նշել է, որ Վարագավանքի վերականգնման համար անհրաժեշտ է դիմացի մզկիթը տեղափոխել այլ վայր: «Մենք համապատասխան դիմումը գրել ենք, ուղարկել ենք: Վանի նահանգապետարանը եւ մշակույթի ու տուրիզմի նախարարությունը հաստատել են վերականգնման ծրագիրը: Հաջորդ տարի կսկսվի եկեղեցական համալիրի վերանորոգումը»-նշել է Մեհմեդը Չոբանը՝ հավելելով, որ նախատեսվում է Աղթամարի եկեղեցու պես լիարժեք վերանորոգում իրականցնել:
Նշենք, որ Վարագավանքը կառուցվել է Ս.Հռիփսիմեի կողմից այդ վայրում թողնված Քրիստոսի խաչափայտի մասունքի տեղում: Սկզբում կառուցվել է Ս.Նշան եկեղեցին, այնուհետեւ եկեղեցիների քանակը հասել է 7-ի։ Վարագավանքը կարեւոր դերակատարություն է ունեցել արեւմտահայության կյանքում։
Հոկտեմբեր 26, 2010 | 15:03
Leave a Reply