Եկեղեցու կապակցությամբ հանդիպում կայացավ երկու համայնքի ներկայացուցիչների միջև

 Քանի որ Հրանտ Դինքի ծնդդավայր Մալաթիայի Չավուշօղլու թաղամասում գտնվող Թաշհորոն հայկական եկեղեցին վերանորոգել ցանկացող կազմակերպությունը չկարողացավ դա անել, այս գործին խառնվեց մզկիթների կազմակերպությունը:

Սակայն վերոհիշյալ երկու կազմակերպություններին էլ ոչ մի կերպ չհաջողվեց աշխատանքը գլուխ բերել, և այն դադարեցվեց: Հիմա թե’ մահմեդական և թե’ հայկական համայնքները համատեղ են որոնում եկեղեցու վերականգնման համար անհրաժեշտ աջակցությունը: Երկու տարի առաջ կառավարությանն ու Մշակույթի և զբոսաշրջության նախարարությանն այս հարցով դիմած Չարմուզու Թեփեբաշը մզկիթի կառուցման և պահպանման միության նախագահ Լաթիֆ Յըլդըրըմը հանդես եկավ 250 տարվա պատմություն ունեցող Թաշհորոն հայկական եկեղեցու և գերեզմանատան վերականգնման նախաձեռնությամբ: Քանի որ ՙԱքշամ՚ օրաթերթի կողմից նախկինում հաղորդված վերականգման նախագծին ոչ ոք չաջակցեց, այդ հանգամանքը հուսահատության տեղիք տվեց: Ի վերջո, կազմակերպությունը, որը չէր կարողանում անգամ հոգալ վարձակալման և էլեկտրականության ծախսերը, փակվեց: Այս ամենից հոգնած Յըլդըրըմը հայտնեց, որ փակել է կազմակերպությունը, սակայն շարունակելու է աջակցություն փնտրել:

Ձեռք ձեռքի տվեցին

Ստամբուլաբնակ մալաթիացի հայերը ևս, Մալաթիայի հայկական միություն (Malatya-Hay-Der) անվամբ մի կազմակերպություն հիմնելով, որոշեցին աջակից լինել Թաշհորոն եկեղեցու վերականգնողական աշխատանքներին: Մալաթիայի հայկական միության քարտուղար Խոսրով Քյոլեդավիթօղլուն հետևյան ասաց. ՙՄզկիթի համայնքի հետ համագործակցելով` աշխատանքներ ենք իրականացնելու` եկեղեցին նորոգելու և կրոնական արարողությունների համար բացելու ուղղությամբ: Անշուշտ, մզկիթի համայնքի օգնությունը չէր կարող բավարար լինել: Համատեղ ենք գործելու` մեր արժեքների պահպանման համար: Շնորհակալություն ենք հայտնում Չարմուզու Թեփեբաշը մզկիթի կառուցման և պահպանման միության ղեկավարությանը, անդամներին և բոլորին՚:

Օմեր Յալչընը հաղորդում է Մալաթիայից

aksam.com.tr
24.10.2010