Պաշտոնական այցով Թուրքայում գտնվող Գերմանիայի նախագահ Քրիստիան Վուլֆը Տարսոնում (Կիլիկիա) գտնվող Սուրբ Պողոս եկեղեցում պատարագի է մասնակցել։
Թուրքական Anadolu գործակալության փոխանցմամբ՝ Քրիստոսի 12 առաքյալներից մեկի անունը կրող եկեղեցում Գերմանիայի նախագահի եւ նրա կնոջ հետ միասին, պատարագին մասնակցել են Պոլսո Հայոց պատրիարքական ընդհանուր փոխանորդ արք. Արամ Աթեշյանը, ասորական եկեղեցու Ադըյամանի եպիսկոպոս Մելքի Ուրեքը, Մերսինի իտալական եկեղեցու վանահայր Ռոբերտո Ֆերարին։
Գերմանիայի նախագահին եկեղեցու մուտքի մոտ դիմավորել են Մերսինի փոխնահանգապետը, Տարսոնի քաղաքապետը, Մերսինի առեւտրաարդյունաբերական պալատի նախագահը եւ այլ բարձրաստիճան պաշտոնյաներ։
Մոտ 45 րոպե տեւած պատարագից հետո Քրիստիան Վուլֆը պատասխանել է լրագրողների հարցերին՝ անհրաժեշտ համարելով, որ Թուրքիայում գտնվող բոլոր եկեղեցիներում պատարագ մատուցելու պահանջի դեպքում թույլատրվեն այն իրականացնել։ «Դա վերաբերում է նաեւ այս եկեղեցուն։ Քանի որ այս եկեղեցիները կառուցվել են 3-րդ, 4-րդ, 5-րդ դարերում, երբ տարածվել էր քրիստոնեությունը»,-նշել է Գերմանիայի նախագահը՝ հավելելով, որ ինքն ու իր կինը մեծ երջանկություն կզգան կրկին գալ այդ եկեղեցի եւ մասնակցել պատարագի:
Այնուհետ գերմանացի ղեկավարը եւ նրան ուղեկցող պատվիրակությունն այցելել են Սուրբ Պողոսի անունը կրող ջրհոր, լվացվել ջրհորից հանած ջրով եւ մեկնել Ադանա։
Հոկտեմբեր 22, 2010
Leave a Reply