“Գյավուր” բառի համար հակազդեցություն` նախարարին

Մարդինի Միդյաթ գավառում Ասորական մշակույթի կազմակերպության նախագահ Յուհաննա Աքթաշը հակազդեցություն արտահայտեց Թուրքիայի պետնախարար Ֆարուք Չելիքի հետևյալ այն խոսքերին, որ վերջինս արտահայտել էր մի հեռուստածրագրի շրջանակներում. “Եթե գյավուրի կրոնը` քրիստոնեությունը, սովորում ենք, ինչու ալևիականությունը չսովորենք որ”: Աքթաշը պահանջեց, որ նախարար Չելիքը ներողություն խնդրի Թուրքիայում բնակվող քրիստոնյաներից:

Պնդվում է, թե Կրոնական գործերի նախարարության պատասխանատու, պետնախարար Ֆարուք Չելիքը, մասնակցելով մի հեռուստածրագրի և իր մտքերն արտահայտելով ալևիականության և հարկադիր կրոնական դասերի մասին, ասել է. “Եթե գյավուրի կրոնը` քրիստոնեությունը, սովորում ենք, ինչու ալևիականությունը չսովորենք որ”:

Միդյաթի Ասորական մշակույթի կազմակերպության նախագահ Յուհաննա Աքթաշը, առաջ քաշելով այն տեսակետը, թե նախարար Չելիքը ալևիների արդարացի պահանջները ճնշելու համար ստորացրել է քրիստոնեությունը, ասաց, որ այդ խոսքերը վիրավորել են իրենց և հնագույն կրոն քրիստոնեությանը: Աքթաշն արձանագրելով, թե մայրապետերին ուղղված հայտարարությունների պատճառով ներողության պարտք ունեն նաև պարոն վարչապետ Էրդողանն ու հիմնական ընդդիմադիր կուսակցություն եղող Ժողովրդահանրապետականի առաջնորդ Քեմալ Քըլըչդարօղլուն, հետևյալն ասաց այդ կապակցությամբ. “Հանրաքվեից առաջ տեղի ունեցած հանրահավաքների ժամանակ վարչապետ Ռեջեփ Թայյիփ Էրդողանը և Ժողովրդահանրապետականի առաջնորդ Քեմալ Քըլըչդարօղլուն, քննադատելով այն հագուստը, որ կրում են մեզ համար շատ արժեքավոր մեր մայրապետերը, այդ հանգամանքը որպես գործիք օգտագործեցին քաղաքականության մեջ: Մենք բոլորս այդ հայտարարության շնորհիվ տեսանք, թե նախարար Ֆարուք Չելիքի ենթագիտակցության տակ ինչեր են թաքնված` ոչ մահմեդականների հանդեպ: Մենք պարսավում ենք այդ մտայնությունը: Հարգելի Չելիքը պարտավոր է գիտենալ, որ քրիստոնեությունը հնագույն կրոն է: Բացի այդ` կցանկանայինք, որ հանվեին հարգելի Չելիքի` մեզ գյավուր ասելուն հնարավորություն տված Ազգային կրթության նախարարության փաստաթղթերում տեղ գտած քրիստոնեությանն առնչվող սխալ և ստորացուցիչ տեղեկությունները: Ուզում ենք, որ նախարարը ներողություն խնդրի մեր երկրի բոլոր քրիստոնյաներից` իր այդ տարաբախտ մեկնաբանությունների պատճառով”:

 gazetevatan.com
14.10.2010