Թուրքիայում կդատեն Դինքի ընտանիքի փաստաբանին

“Ակօս” շաբաթաթերթի սպանված խմբագրապետ Հրանտ Դինքի ընտանիքի փաստաբաններից Հաքան Բաքըրջըօղլուն դատարանի առջև կկանգնի «տրապիզոնցիներին վիրավորելու» մեղադրանքով: Այս մասին տեղեկացնում է ANF գործակալությունը ավելացնելով, որ Թուրքիայի Արդարադատության նախարարությունը թույլատրել է դատական գործ սկսել Դինքի ընտանիքի փաստաբանի դեմ:

ANF գործակալության փոխանցմամբ` Դինքի ընտանիքի փաստաբան Հաքան Բաքըրջըօղլուի և խմբագրապետի սպանության գործով անցնող Տրապիզոնի ժանդարմերիայի նախկին հրամանատար գնդապետ Ալի Օզի փաստաբանի` Ալի Սյուրմենի միջև վիճաբանություն էր տեղի ունեցել Տրապիզոնի դատարանում տեղի ունեցած նիստից հետո:

Նիստի ավարտին Ալի Սյուրմենը հրաժարվել էր պատասխանել լրագրողների հարցերին հայտարարելով, որ «որևէ ինֆորմացիա տրամադրելն» արգելված է: Սակայն այդ պահին Դինքի ընտանիքի փաստաբաններից Բահրի Բելենը հայտարարել էր, որ հաջորդ դատական նիստը տեղի կունենա դեկտեմբերի 25-ին, որի ընթացքում Դինքի սպանության առնչությամբ դատարանը կլսի հետախուզության ծառայության որոշ աշխատակիցների: Այդ հայտարարությունից հետո Դինքի ընտանիքի փաստաբանին հանդիմանել էր Ալի Սյուրմենին ասելով. «Շոու մի սարքեք: Եթե բան ունեք ասելու, կանգնեք և ասեք ու բարի եղեք սպասել պատասխանին, այլ ոչ թե երեխաների պես ասեք ու հեռացեք»:

Ալի Սյուրմենի այդ հանդիմանությանը հակազդել էր Դինքի ընտանիքի մեկ այլ փաստաբան Հաքան Բաքըրջըօղլուն` ասելով. «Դուք էլ լավ գիտեք՝ ինչպես մարդ սպանել, այնպես չէ՞»:

Ալի Սյուրմենն այդ խոսքերի պատճառով դիմել էր Թուրքիայի Արդարադատության նախարարություն` խնդրելով թույլատրել դատական գործ սկսել Հաքան Բաքըրջըօղլուի դեմ:

Առաջին դատական նիստը տեղի կունենա դեկտեմբերի 1–ին։

12.10.10

Tert.am