Քենդիրլի եկեղեցին

Գազիանթեփ նահանգի կենտրոնում` Աթաթուրքի անվան զբոսայգու վերևում` Ուսուցիչների տան հարևանությամբ գտնվող այս եկեղեցին կառուցվել է 1860 թ. գազիանթեփցի կաթոլիկ հայերի կողմից` Ֆրանսիայի Նապոլեոն 3-րդ թագավորի, ֆրանսիացի միսիոններների և կաթոլիկների նյութական աջակցությամբ: 1898 թ. այս եկեղեցին փլուզվել է, որի տեղում կառուցվել է այսօրվա եկեղեցին, որը բացվել է 1900 թ.:

Եկեղեցին կառուցվել է Հռոմում գտնվող Սուրբ Ֆրանսուա եկեղեցու օրինակով: Եկեղեցու նախագիծը արժանացել է Վատիկանի պապական իշխանության հավանությանը:

Եկեղեցին կառուցվել է ընդարձակ բակում սրբատաշ սև քարե հիմքերի վրա, սպիտակ սրբատաշ քարից: Բացի այդ եկեղեցու հատակը շարված է շախմատաձև`կարմիր և սպիտակ քարերով: Եկեղեցի մտնում են եռաստիճան սանդուղքով: Ծիսական արարողությունների սրահը  խաչաձև կամարապատ է: Նրբակերտ ու երկարավուն կառույց հանդիսացող եկեղեցին ծածկված է ծալքավոր տանիքով:

Քանի որ մեր օրերում Գազիանթեփում հայկական համայնք չկա, եկեղեցին կորցրել է իր գործառույթը` վերածվելով Ուսուցիչների տանը կից տարածքի: Այդ ընթացքում գլխավոր սրահը բետոնե դռնով բաժանվել է երկու մասի, որի արդյունքում եկեղեցու ներսը փոխվել է:

 http://www.gaziantep.com/tr/yerel-bilgiler/kendirli-kilisesi