Խաղաղություն և ժողովրդավարություն կուսակցության անդամ, Շըրնաքի պատգամավոր Հասիփ Քափլանը Ազգանունների մասին օրենքում փոփոխություն մտցնելու վերաբերյալ մի օրինագիծ է պատրաստել: Քափլանը Թուրքիայի Ազգային Մեծ ժողովի /ԹԱՄԺ/ նախագահությանը ներկայացրած օրինագծի հիմնավորման մեջ շեշտել է, որ Թուրքիայի Հանրապետության սահմաններում որպես Թուրքիայի քաղաքացիներ են ապրում մեկից ավելի ազգությունների ներկայացուցիչներ` թուրքեր, քրդեր, արաբներ, չերքեզներ, աբխազներ, ասորիներ, հայեր և այլոք: Այնուհետև Քափլանը պահանջել է, որ Քաղաքացիության մասին օրենքի սահմաններում ճանաչեն յուրաքանչյուրի` իր ազգանունը ազատորեն որոշելու իրավունքը: Օրինագծի մեջ, որտեղ նշվում է, թե 1934 թ. մինչ օրս գործող և երբեք չփոփոխված Ազգանունների մասին օրենքը չի համապատասխանում օրվա պահանջներին, ասվում է հետևյալը. «Չնայած որ օրենքը հայտնում է, թե «թուրք ազգից» բացի այլ` օտար, ժողովուրդների ազգանունները չեն կարող որպես ազգանուն օգտագործվել, պարզ նշված չէ, թե «օտար ժաղավուրդ» ասելով` ինչ են հասկանում: Իսկ կիրառման մեջ «օտար ժողովուրդ» հասկացությունը «քուրդ ժողովրդի հետ ասոցացվող պատկերների դեմ շատ կոշտ է կիրառվել»»: Օրինագծում նախատեսված էր ընդգրկել նաև հետևյալ դրույթը. «Կինը, ինչպես կարող է կրել միայն իր ամուսնու ազգանունը, այնպես էլ ամուսնու ազգանվան հետ մեկտեղ կարող է օգտագործել նաև օրիորդական ազգանունը»:
05.10.2010
Sabah.com.tr
Leave a Reply