Թուրքիայի «Ազգայնական շարժում» ընդդիմադիր կուսակցության առաջնորդ Դևլեթ Բահչելիի նախընտրական շոուն շարունակվում է: Անիի Մայր տաճարում ուրբաթօրյա նամազն անելուց հետո Բահչելին իր կուսակիցների առջև ելույթ է ունեցել հայ-թուրքական սահմանին գտնվող Ալիջան անցակետի մոտ:
Թուրքական Dogan («Դողան») գործակալության փոխանցմամբ` Դևլեթ Բահչելին իր ելույթում հնչեցրել է հակահայկական հայտարարություններ և քննադատել Թուրքիայի վարչապետ Ռեջեփ Թայիփ Էրդողանի գլխավորած «Արդարություն և զարգացում» կուսակցության` Հայաստանի առնչությամբ իրականացվող քաղաքականությունը:
Հայաստանին համեմատելով Կովկասում խաղաղությանն ու անվտանգությանը սպառնացող «թարախապալարի հետ»` թուրք ազգայնականը հայտարարել է.
«Հայաստանի և Թուրքիայի միջև հարաբերությունների կարգավորման ամենամեծ խոչընդոտը թուրքական թշնամանքի վրա հիմնված հայկական քաղաքականությունն է: «Արդարություն և զարգացում» իշխող կուսակցությունն արտաքին ճնշումների ներքո ի շահ հայերի նեղացրեց և վիրավորեց մեր ադրբեջանցի եղբայրներին: Այդ արատավոր քաղաքականության հետևանքով շատ վտանգավոր փուլ թևակոխեցին մեր հարաբերությունները բարեկամ և եղբայր Ադրբեջանի հետ: Ցանկանում եմ, որ մեր ադրբեջանցի եղբայրներն իմանան հետևյալը. թուրք ազգը Ադրբեջանի կողքին է և շարունակելու է մինչև վերջ աջակցել: Թուրք ազգը թույլ չի տա, որ քայլեր կատարվեն ի վնաս ադրբեջանցի եղբայրների»,- հայտարարել է Բահչելին` ավելացնելով, որ իրենք անպայման ուղղելու են իշխող կուսակցության սխալները:
Ընդգծելով, որ քանի դեռ «հայկական ուժերը չեն հեռացել ադրբեջանական զբաղեցված տարածքներից», հայ-թուրքական սահմանը չի բացվելու և Երևանի հետ դիվանագիտական հարաբերություններ չեն հաստատվելու, Բահչելին իր հետ Ալիջանի սահմանադուռ ժամանած «Ազգայնական շարժում» կուսակցությունից պատգամավորներին կոչ է արել պատ կազմել սահմանին:
Ազգայնական պատգամավորները, ընդառաջ գնալով իրենց առաջնորդի կոչին, սահմանին պատ են կազմել` շարվելով կողք-կողքի:
04.10.10
Tert.am
Leave a Reply