Դիարբեքիրում բացվում է 2009-ին մահացած հայտնի հայազգի երաժիշտ Արամ Տիգրանի անվան քաղաքային կոնսերվատորիան: Այն կսկսի գործել նոյեմբերի 1-ից:
Կրթական հաստատության մեջ նախատեսված է ուսուցանել երաժշտություն, ֆիլմարվեստ, թատերական արվեստ, ժողովրդական պարեր եւ արվեստի այլ ճյուղեր, ինչպես նաեւ կդասավանդվի քրդերեն եւ արվեստի պատմություն:
Նշենք, որ Մերձավոր Արեւելքի սոխակ համարվող հայազգի երաժիշտը, ով ծնվել է 1934-ին Սիրիայի Քամիշլի քաղաքում, 20 տարեկանից իրեն նվիրել է երաժշտությանը՝ երգելով հայերեն, քրդերեն, թուրքերեն, արաբերեն, հունարեն եւ ասորերեն։ Արամ Տիգրանը մի շարք հայկական ժողովրդական երգեր թարգմանել է՝ երգելով քրդերեն եւ հակառակը։
Արամ Տիգրանի երազանքը՝ թաղվել Դիարբեքիրում, չկատարվեց, քանի որ թուրքական իշխանությունները թույլ չտվեցին հայազգի երաժիշտին թաղել Դիարբեքիրի հայկական գերեզմանոցում։ Այնուամենայնիվ, Դիարբեքիրի հայկական գերեզմանոցում կատարվեց Արամ Տիգրանի սիմվոլիկ թաղումը, իսկ արդեն նրա համար փորված գերեզմանի հողը Դիարբեքիրի քաղաքապետ Օսման Բայդեմիրը իր հետ տեղափոխեց Բրյուսել, որտեղ, որ թաղվել է երաժիշտը։
Հոկտեմբեր 04, 2010
Leave a Reply