Սեպտեմբերի 26-28 ը , սփիւռքահայ փոքր խմբի առաջարկով նրանց ուղեկցում էի դէպի Անի , Բայազետ , Վան , Բիթլիս , Մուշ եւ Կարս : Սեպտեմբերի 26 ին , Կիրակի օրը , ընդամէնը մէկ շաբաթ անց Սեպտեմբերի 19 ի պատարագից , հայերին թոյլ չտուեցին Աղթամարի Սուրբ Խաչ եկեղեցու ներսում « Հայր Մերը » աղօթել : Ամբողջ օրը կղզում եւ եկեղեցում հսկողութիւն իրականացնող ոստիկանները ոչ միայն արգելում են մոմավառութիւնը , այլ որեւէ աղօթք : Բելգիացի զբօսաշրջիկները , որոնք այդ պահին եկեղեցում էին , զարմացած էին թուրք ոստիկանների պահուածքից : Երբ քաշքշուկով աւարտուեց « Հայր Մերը » , ոստիկաններից մէկը մեզ ասաց , որ իրենց հրահանգել են թոյլ չտալ բարձրաձայն աղօթել , քանի որ սա թանգարան է : Անիմաստ էր բացատրել , որ անգամ թանգարանում արգելուած չէ աղօթելը :
Այս հաղորդագրութիւնը տարածում եմ ոչ թէ հակաթուրք տրամադրութիւններ ցանելու , այլ պարզապէս հայ ուխտաւորներին տեղեակ պահելու , որ նրանք Սուրբ Խաչում աղօթել կամ մոմ վառել կարող են եկեղեցու բակում միայն :
Յաւելեմ նաեւ , որ Անիի եկեղեցիներում , աւելի յստակ Մայր Տաճարում , որտեղ պատրաստւում է ուրբաթօրեայ նամազ անել « Ազգայնական շարժում » կուսակցութեան առաջնորդ Դեւլեթ Բահչելին , հսկողութիւն չի իրականացւում եւ հանգիստ կարելի է մոմ վառել ու աղօթել : Կարսի Առաքելոց եկեղեցին , որը տարիներ առաջ թանգարանից վերածուեց մզկիթի , գրեթէ այցելուներ չունի : Կարսում բոլորը գիտեն եւ Առաքելոցը շարունակում են կոչել իր ճիշտ անունով , Էրմենի Քիլիսեսի , ասյինքն` հայկական եկեղեցի :
Թաթուլ Յակոբեան,
լրագրող, Սիվիլիթաս հիմնադրամի փորձագէտ
Leave a Reply