Ըստ «Ակօս»ի՝ պոլսահայութիւնը անտարբեր է

Քեմբ ԱրմէնՊՈԼԻՍ.- Պոլսոյ «Ակօս» թերթին կարծիքով, «Քեմբ Արմէն»ի խնդիրը կը մնայ պոլսահայ համայնքի հիմնական «գլխացաւերէն» մէկը:

Այս մասին թերթը 31 Յուլիս թուակիր իր թիւին մէջ անստորագիր ակնարկ մը ներկայացուցած է՝«Օգնենք Արմէնակներուն եւ Արմէնուհիներուն» խորագիրով: «Ակօս», որ դրուատիքով խօսած է «Քեմբ Արմէն»ի խնդիրին վերաբերեալ «Նոր Զարթօնք»ի տղոց կեցուածքներուն մասին, նաեւ գրած է, թէ Պոլսոյ հայկական շրջանակներուն մօտ այս խնդիրին հանդէպ ընդհանուր անտարբերութիւն մը երեւելի է:

«Ակօս» նոյնպէս որոշ մտահոգութիւն յայտնած է երկրին մէջ տիրող անստոյգ (բառը «Ակօս»ինն է) իրավիճակին վերաբերեալ, որ նոյնպէս իր վատ ազդեցութիւնները կրնայ ունենալ Թուզլա շրջանը գտնուող «Քեմբ Արմէն»ի խնդիրին, ինչպէս նաեւ՝ Պոլսոյ հայութիւնը յուզող տարբեր խնդիրներու կապակցութեամբ:

Յիշեցնենք, որ «Քեմբ Արմէն»ը կը պատկանի Պոլսոյ Աւետարանական համայնքին (Կետիկփաշա շրջանի եկեղեցական խորհուրդ), եւ կառոյցը՝ որպէս ապաստանարան, երկար տարիներ ծառայած է համայնքին: Կառավարութիւնը որոշած է, թէ շէնքը պէտք է փլել, իսկ կառոյցի հողատէրը կը փափաքի զայն ամբողջութեամբ վերադարձնել իր իրաւատիրոջ՝ Պոլսահայ աւետարանական համայնքին:

Asbarez.com

Leave a Reply

Your email address will not be published.