Թուրքիայում չերքեզները սեփական կուսակցությունն են ստեղծում

Պլյուրալիստական ժողովրդավարական շարժումԹուրքիայում ապրող չերքեզները 2014թ. գարնանը պաշտոնապես կհայտարարեն Պլյուրալիստական ժողովրդավարական շարժում կուսակցության ստեղծման մասին, գրում է Haberler-ը:

Արդեն ստեղծվել է ապագա կուսակցության կայքը, որում տեղ գտած հայտարարության մեջ ասվում է, որ կուսակցությունը հետամուտ է լինելու Թուրքիայում ապրող ազգային փոքրամասնությունների իրավունքների պաշտպանությանը: Նշվում է, որ Թուրքիայում սկսված ժողովրդավարացման գործընթացը իր մեջ ներառում է միայն քրդերին և դուրս թողնում մյուս էթնիկ փոքրամասնություններին:

Այսպես՝ ապագա կուսակցությունը որպես իր նպատակ է հռչակում ինչպես չերքեզների, այնպես էլ Թուրքիայում ապրող լազերի, գյուրջուների՝ իսլամ ընդունած վրացիների, արնավութների՝ Բալկանյան երկրներից Թուրքիա գաղթած մուսուլման բնակչության իրավունքների պաշտպանությամբ հանդես գալը:

Թուրքիայում «չերքեզ» ընդհանրական անվանումը վերաբերում է ոչ միայն զուտ չերքեզներին, այլև 19-րդ դարի կեսերին Ռուսաստանից Թուրքիա տեղահանված հյուսիսկովկասյան մյուս ժողովուրդներին: Թուրքիայում բնակվող չերքեզների թիվը բավական մեծ է: Նրանք քրդերից հետո հավանաբար Թուրքիայի ամենամեծ իսլամադավան հանրույթն են: Վերջին տարիներին ստեղծվել են չերքեզների իրավունքների պաշտպանությամբ զբաղվող մի քանի կազմակերպություններ, որոնք հիմնականում բարձրացնում են մշակութային հարցեր:

http://civilnet.am/2013/11/22/cherkez-party-established-turkey

Leave a Reply

Your email address will not be published. Required fields are marked *