ԵՊՀ պատմության ֆակուլտետի շրջանավարտներն իրենց դիպլոմներն ստացել են Անիի Մայր տաճարում

Անիի հիմնադրման 1050-ամյակին նվիրված միջոցառումների շրջանակներում ԵՊՀ պատմության ֆակուլտետի դեկան Էդիկ Մինասյանի եւ ավարտական քննական հանձնաժողովի նախագահ, ԳԱԱ պատմության ինստիտուտի տնօրեն, ԳԱԱ թղթակից անդամ Աշոտ Մելքոնյանի նախաձեռնությամբ որոշվեց ֆակուլտետի շրջանավարտներին տանել Արեւմտյան Հայաստան եւ դիպլոմների հանձնման պաշտոնական արարողությունը կատարել Անիի Մայր տաճարում:

Ինչպես նշում է պարոն Մինասյանը, իրենց նախաձեռնությունը մինչ այդ իր նախադեպը չունեցող եզակի ու բացառիկ երեւույթ է, որը, սակայն, պետք է դառնա ավանդույթ: Պատմության ֆակուլտետն արդեն ունի այդպիսի ավանդույթ. ֆակուլտետի ուսանողներն իրենց ուսանողական տոմսերը, ստուգման գրքույկները եւ դիպլոմները ստանում են պատմական նշանակություն ունեցող տարբեր վայրերում:

«Միջնադարյան համալսարաններում ընդունված էր ավարտական վկայականները հանձնել մեծ հանդիսավորությամբ, եւ մենք այսօր այդ ավանդույթը վերականգնում ենք մեր պատմական հայրենիքի մի մասում` ցույց տալու, որ Անին դեռ կենդանի է, որ բարձրագույն ուսումնական այդ հաստատությունների լավագույն ավանդույթները փոխանցվել են ԵՊՀ-ին, եւ Անին կարող է վերակենդանանալ մեր ուսանողների շնորհիվ»,- նշեց Էդիկ Մինասյանը:

Վերջինս իր խոսքում շեշտեց, որ իրենք ցանկանում էին ուսանողներին անձամբ ծանոթացնել մեր պատմական հայրենիքի կորցրած տարածքներին, մանավանդ որ ուսանողների մեծ մասի արմատները հենց Արեւմտյան Հայաստանից են, նրանց` իբրեւ պատմաբանների, մշակութաբանների եւ արվեստաբանների, ծանոթացնել պատմական հուշարձաններին ու այն վայրերին, որտեղ տեղի են ունեցել հայոց պատմության նշանավոր իրադարձությունները:

Շուրջ 100 հոգուց բաղկացած խումբը, որի կազմում ոչ միայն Պատմության ֆակուլտետի շրջանավարտներն էին, այլեւ ուսանողներ եւ դասախոսներ տարբեր ֆակուլտետներից, հունիսի 24-26-ը այցելեց պատմական Հայաստանի տարբեր վայրեր` Ախալքալաք, Ախալցխա, Արդահան, Կարս, Բայազետ, Կողբ, Իգդիր, Արծափ, Վան, Ախթամար կղզի: Ճանապարհորդությունը ոչ միայն ծանոթացում էր պատմական վայրերին եւ հուշարձաններին, այլեւ պատմության դասերի մի շարք. այդ տարածքների եւ կոթողների պատմությունները ներկայացվում էին ուսանողներին ամենայն մանրամասնությամբ ոչ միայն դասախոսների, այլեւ ակտիվ ուսանողների կողմից:

Բակալավրիատի եւ մագիստրատուրայի 70 շրջանավարտների դիպլոմների հանձնման պաշտոնական արարողությունը տեղի ունեցավ Անիի Մայր տաճարում: Արարողության կատարմանը աջակցել է Արեւելագիտության ֆակուլտետի դասախոս Աշոտ Սողոմոնյանը, ում ջանքերով շրջանավարտների համար պատրաստվել էին սպիտակ համազգեստներ եւ գլխարկներ` ԵՊՀ-ի անգլերեն անվամբ եւ գերբով:

Պատմաբաններին դիպլոմներ հանձնեց Աշոտ Մելքոնյանը, արվեստաբաններին` Էդիկ Մինասյանը, իսկ մշակութաբաններին` պրոֆեսոր Իգիթ Ղարիբյանը: Դիպլոմների պաշտոնական հանձնումից հետո բոլորը երգեցին «Հայր մեր»-ը եւ Անիի պարիսպների շուրջ պարեցին հայկական քոչարի` վերակենդանության շունչ հաղորդելով մայրաքաղաքին:

Պարոն Մինասյանն իր հիացմունքը հայտնեց նաեւ ուսանողների պահվածքի վերաբերյալ. «Մեր ուսանողներն իսկապես շատ հայրենասեր ու նվիրված են եւ կարող են այնպիսի սերունդ դաստիարակել, որը, վստահ եմ, կարող է ազատագրել մեր պատմական հայրենիքը: Նույնիսկ վատ առաջադիմություն ունեցող ուսանողներն իրենց իսկական հայրենասերի նման պահեցին. ամբողջ ճանապարհն ուղեկցվել է նրանց հայրենասիրական երգ ու պարով: Անգամ ճանապարհին իրենց հանդիպած քրդերին պատմում էին, որ այդ տարածքները մեզ են պատկանում: Ես շատ ուրախ եւ հպարտ եմ, որ մենք ունենք գաղափարապես ու հոգեպես հարուստ նման սերունդ»:

Երեւանի Պետական Համալսարանի պաշտոնական կայք

Leave a Reply

Your email address will not be published. Required fields are marked *