Սևակ Բալըքչըի փաստաբանը ենթադրում է, թե «Սևակը ապրիլի 24-ին կարող է սպանված լինել կանխամտածված կերպով»

Էքին Քարաջա

Ապրիլի 24-ին զինվորական ծառայության ժամանակ սպանված Սևակ Բալըքչըի ընտանեկան փաստաբան Ջեմ Հալավուրթն ուսումնասիրություններ է կատարել այն ոստիկանական տեղամասում, որտեղ գրանցվել է դեպքը: Հալավուրթը նշելով, որ Բալըքչըի մահվանը պատճառ դարձած Աղաօղլուի facebook-ի էջը լիուլի է եղել թուրք-իսլամական սինթեզի մասին բովանդակությամբ տեսաֆիլմերով, ասում է նաև, թե համոզիչ չէ սույն դեպքի «պատահականություն» լինելու վարկածը:

Հայերի կոտորածների սկիզբը եղած 1915 թ. ապրիլի 24-ի 96-րդ տարելիցի օրը Բաթմանի Գյումյուշօրգյու ոստիկանական տեղամասում զինվորական ծառայության ժամանակ Քըվանչ Աղաօղլուի հրացանից արձակված կրակոցից կյանքը կորցրած հայ քաղաքացի Սևակ Բալըքչըի ընտանեկան փաստաբան Ջեմ Հալավուրթը հարցազրույց է տվել Bianet լրատվական կենտրոնին:

Յազըջըօղլուի տեսաֆիլմը սպանվածի facebook-ի էջում

Այն ոստիկանական տեղամասում, որում տեղի է ունեցել դեպքը, մայիսի 1-ին ուսումնասիրություններ կատարած Բալըքչըի ընտանեկան փաստաբան Հալավուրթը շեշտեց, թե որքան էլ ասեն, որ դեպքը «պատահականություն» է եղել, հանցագործության հավանականությունը ևս մեծ է:

Փաստաբան Հալավուրթը հայտնեց, որ մարդասպանության մեջ կասկածվող Աղաօղլուի սոցիալական հաղորդակցության էջից` facebook-ից, պարզվել է, թե կասկածյալը Մեծ միասնության կուսակցության (BBP) համակիրներից է, սակայն այդ էջը որոշ ժամանակ անց փակվել է:

Հալավուրթը թեմայի առնչությամբ հետևյալ մեկնաբանություններն է արել Bianet լրատվական կենտրոնին.

* Երբ ուսումնասիրեցինք Աղաօղլուի facebook-ի էջը, նկատեցինք, որ տվյալ անձը եղել է Մեծ միասնության կուսակցության (BBP) և թուրք-իսլամական սինթեզի համակիրներից:

* Նրա էջում հանդիպեցինք ազգայնամոլական բովանդակությամբ բազմաթիվ թեմաների: Օրինակ` մեծ տեղ էին գրավում Մուհսին Յազըջըօղլուի տեսաֆիլմերը և Աբդուլլահ Չաթլըի նկարները:

«Մենք չհամոզվեցինք»

* Մենք ուսումնասիրություններ կատարեցինք դեպքի վայրում: Այնտեղ զրուցեցինք զինվորների և դեպքի ականատեսների հետ: Մեր զրուցակիցները հայտարարեցին, թե դեպքը պատահականություն է եղել:

* Սակայն քանի դեռ դատական գործընթացը չի սկսվել, քանի դեռ վկաները և մեղադրյալը չեն հարցաքննվել խաչաձև հարցաքննության մեթոդով, անհնար է, որ ճշմարտությունը լիովին բացահայտվի:

* Մեր կատարած ուսումնասիրությունների արդյունքում ինչքան էլ վկաներն ասեն, թե դեպքը «պատահականություն» է եղել, մենք համոզված չենք դրանում:

* Ոստիկանական տեղամասը շատ փակ վայր է: Մեքենայով կարելի է հասնել մեկ ու կես ժամում, սակայն երբ ի նկատի ենք ունենում զինվորական հիերարխիան, ենթադրում ենք, թե մեծ է հավանականությունը, որ այդ անցած ժամերի ընթացքում վկաներն ուղղորդված լինեն:

* Վկաների` մեզ տված ցուցմունքներում մի շարք հակասություններ կային: Այդ հանգամանքը նույնպես ավելացրեց մեր կասկածները: Այս պահին ո’չ ես, ո’չ էլ Սևակի ընտանիքը տեղյակ չենք` դեպքը պատահականություն է եղել, թե հանցագործություն: Կա հավանականություն, որ ապրիլի 24-ին տեղի է ունեցել կանխամտածված սպանություն:

* Այս դեպքը խոսում է նաև բարձրաստիճան զինվորականների ցուցաբերած մեծ անփութության մասին: Եթե այնտեղ ուղարկված երեխաների հետ բարձրաստիճան զինվորականներ լինեին, այդ դեպքը տեղի չէր ունենա:

Էքին Քարաջա/[email protected]

Bianet լրատվական կենտրոնը հաղորդում է Բաթմանից

http://bianet.org/bianet/diger/129759-halavurt-sevag-24-nisanda-planli-sekilde-oldurulmus-olabilir