«Միացեալ Նահանգներու կողմէ Հայոց ցեղասպանութեան ճանաչումը գաւազանի եւ ստեպղինի խաղի դրսեւորում Է» կ՛ըսէ Փեսքով

Ուաշինկթընի կողմէ Հայոց ցեղասպանութեան ճանաչումը «գաւազանի եւ ստեպղինի» խաղի դրսեւորում է, ոչ թէ կարեկցանք հայ ժողովուրդին նկատմամբ: «Սփութնիք Արմենիա» կը հաղորդէ, որ այս մասին երէկ Ռուսիոյ պետական պատկերասփիւռի առաջին ալիքի «Մեծ խաղ» յայտագիրէն յայտարարած է Ռուսիոյ նախագահի բանբեր Տմիթրի Փեսքով:

«Ես կը կարծեմ, որ մեծաւ մասամբ այս է Ուաշինկթընի կողմէ Ցեղասպանութեան ճանաչումը. ամենայն հաւանականութեամբ` ատիկա գաւազանի եւ ստեպղինի այս սիրելի խաղին բաղկացուցիչ մասն է: Ատիկա հայ ժողովուրդին կարեկցելու ցանկութիւն չէ, ցանկութիւն չէ խորապէս հասկնալու Օսմանեան կայսրութեան պատմութիւնը, Հայաստանի պատմութիւնը», կը կարծէ Քրեմլինի բանբերը:

Ան նաեւ նշած է, որ Թուրքիոյ գերիշխան քաղաքականութիւնը մտահոգութիւն կը յառաջացնէ Միացեալ Նահանգներու եւ ՕԹԱՆ-ի մօտ, այդ պատճառով ալ անոնք կը փորձեն սաստել Անգարան «Էս-400»¬ի առնչուած պատմութեան եւ Անգարայի այլ գործողութիւններուն պատճառով:

«Ուաշինկթընին հաճելի չի գար այն, թէ ինչպէ՛ս Էրտողանը վստահօրէն յառաջ կը տանի Թուրքիան: Անոնք աւելի պիտի նախընտրէին զիջող Թուրքիա», ըսած է Փեսքով:

https://www.aztagdaily.com/archives/507610