Թուրքիայի գանձագողերն արդեն ունեն իրենց ամսագիրը, որում կիսվում են հայերից ու հույներից մնացած ոսկիների ու թանկարժեք իրերի թաքստոցների տեղանքի մասին մանրակրկիտ տեղեկություններով, դրանք ճիշտ փնտրելու և գտնելու «մեխանիզմներով»: Այս մասին գրում է թուրքական «Հյուրրիյեթ» պարբերականը:
Նշվում է, որ 25 լիրա արժողությամբ ամսագիրն արդեն վաճառքի է հանվել առցանց հարթակում: Գնորդներին առաջարկվում է նաև առաքում, իսկ գովազդում նշվում է, որ ամսագիրը պատրաստվել է «այս գործի մեծ սիրահարների կողմից»:
Նման նախագծի անարգել տարածումը խստորեն քննադատել են Թուքիայի հնագետների միությունում: Միության նախագահ Սոներ Աթեշօղուլլարըն նկատում է, որ ամսագիրը նպաստում է երկրում օրենքով արգելված պեղումների դեպքերի տարածմանը:
«Ցավոք, մեր օրենքներում առկա բացթողումները պատճառ են դառնում երկրի մշակութային ժառանգության ոչնչացման: Ավելի վաղ միություն բացած գանձագողերը հիմա էլ ամսագիր են հրատարակում, մենք իսկապես զարմացած ենք», – ասել է Աթեշօղուլլարըն:
Նշենք, որ Թուրքիայում գանձագողերի գործողությունների պատճառով ամեն տարի ավերման են ենթարկվում բազմաթիվ եկեղեցիներ, պատմական բազմաթիվ հուշարձաններ ու անգամ հին գերեզմանատներ:
Leave a Reply