Թուրքական «Sözcü» թերթն անդրադարձել է հայկական խոհանոցի առանձահատկություններին: «Հայկական խոհանոց ասելիս առաջին հերթին «բնականություն» և բազմազանություն» բառերն են մարդու միտքը գալիս»,- նշվում է հոդվածում: Հայկական խոհանոցի բազմադարյա ավանդույթների վերաբերյալ դիտարկման մեջ հեղինակը հիշեցնում է, որ Երևանի Կարմիր բլրի տարածքում հնագետները պեղումների արդյունքում գտել են խաղողի, կտավատի, ոսպի, ոլոռի, սալորի, քնջութի, գարու և ցորենի հետքեր:
Միևնույն ժամանակ թերթը նշում է, թե հայկական խոհանոցը ժամանակի ընթացքում կրել է ռուսական, թուրքական ու ադրբեջանական խոհանոցների ազդեցությունը:
«Պիտի ասել, որ հայկական խոհանոցում հացամթերքը շատ կարևոր տեղ է զբաղեցնում: Հատկապես գյուղերում կավից պատրաստված թոնրի մեջ հայերը թխում են շատ համեղ հաց: Հայկական ամենահայտնի հացը լավաշն է»,- գրում է «Sözcü»-ն:
Նշվում է, որ հայկական ուտեստների անվանումներում կարելի է թուրքական ծագման բառերի հանդիպել, ինչպես օրինակ` բաստուրմա, բյորեք, քադաիֆ:
Սևանի մասին հիշատակումով հոդվածի հեղինակը նկատել է տալիս նաև հայկական խոհանոցում ծովամթերքի առկայության մասին՝ մասնավորապես շեշտելով կարմրախայտով (իշխան-Ակունքի խմբ.) պատրաստված համեղ ուտեստների մասին:
Թուրքական թերթը հայկական խոհանոցի մասին ճանաչողական իր հոդվածում չի շրջանցում մսամթերքի ու համեմունքների առումով հայերի նախընտրությունները:
Ermenihaber.am
Leave a Reply