Թուրք պրոֆեսորը Թուրքիային խորհուրդ է տալիս Հայոց ցեղասպանությունը «վիճարկել» միջազգային դատարանում

Թուրք պրոֆեսոր Չաղրը Էրհանը թուրքական կառավարությանը խորհուրդ է տալիս Հայոց ցեղասպանության հարցը «վիճարկել» Միջազգային արդարադատության դատարանում:

Ինչպես հաղորդում է «Արմենպրես»–ը` վկայակոչելով «Թուրքի» թերթը, Էրհանը գտնում է, որ «Դիվանագիտական դատարանը ցեղասպանության խնդիրը վիճարկելու միակ ատյանն է»: «Այս հարցին վերջ դնելու եւ այն իրավաբանորեն լուծելու համար առանց ժամանակ կորցնելու Անկարան պետք է դիմի միջազգային դատարան: Դրա համար հիմք է հանդիսանում 1948-ին ստորագրված «Ցեղասպանության հանցագործությունը կանխելու եւ պատժելու վերաբերյալ համաձայնագիր»-ը: Այդ համաձայնագրի 8-րդ հոդվածում ասվում է. «Համաձայնագիրը ստորագրած երկրների միջեւ այս համաձայնագրի մեկնաբանության, իրագործման, ցեղասպանություն տերմինի կամ էլ ցեղասպանություն նշանակող տերմիններից որեւէ մեկի կապակցությամբ պետության պատասխանատվության հետ կապված անհամաձայնություններ ծագելու դեպքում կողմերից մեկի պահանջով այն կարող է վիճարկվել Միջազգային արդարադատության դատարանում», -նշում է թուրք պրոֆեսորը` ասելով, որ դա պետք է անել մինչեւ 2015-ը, քանի որ ցեղասպանության 100-ամյա տարելիցի կապակցությամբ այն ճանաչող պետությունների թիվը կարող է աճել:

«Այս գործը գնալով լրջանում է: Անկարայի համար եկել եւ անցնում է մնայուն լուծումներ ծնող ձեռնարկումների ժամանակը: Եթե այս հարցում, Միջազգային արդարադատության դատարան դիմելուց բացի, այլ առաջարկներ կան, դրանք պետք է հանրային քննարկման դրվեն», -ասում է թուրք պրոֆեսորը:

Armenpress.am