Թուրքիայում եկեղեցիների վերանորոգումը խնդիրներ է առաջացնում

Վիճաբանությունները վերջ չունեն այն բանից հետո, երբ Սամսունի նահանգային գլխավոր խորհուրդը որոշում կայացրեց վերանորոգել Թեքքեքյոյում գտնվող եկեղեցիները` ի նպաստ մշակույթի և զբոսաշրջության զարգացման:

Թեքքեքյոյի քաղաքապետարանի` գավառի կազմում գտնվող պատմական եկեղեցիները վերանորոգելով՝ զբոսաշրջության և մշակույթի համար շահագործելու  վերաբերյալ պահանջը Նահանգային գլխավոր խորհրդի օրակարգ էր բերվել, ձայների մեծամասնությամբ նպատակահարմար էր համարվել, սակայն կայացված որոշումը հակազդեցությունների տեղիք էր տվել: Նահանգային գլխավոր խորհդի նախագահ Մուստաֆա Քարաքուրթը սեպտեմբերին կայացած նիստի բացման ժամանակ պատասխանել է այդ բողոքներին: Մուստաֆա Քարաքուրթը հայտնելով, որ որոշ սյունակագիրների ու միությունների նախագահների դրսևորած բողոքներում հետաքրքիր արտահայտություններ են տեղ գտել, ասել է. «Որոշ սյունակագիրներ բարձրացրել են այս հարցը, որից հետո էլ մի միության պրոֆեսոր նախագահ  անդրադարձել է նույն թեմային: Կան արտահայտություններ, որոնք, ըստ իս, հետաքրքրական են: Այս միության նախագահի հայտարարության մեջ շատ ծանր արտահայտություն կար` «անտեսանելի մի ձեռք ջանում է վերակենդանացնել քրիստոնեական մշակույթը»: Սա չենք ընդունում: Ընդունում ենք որպես սխալ գնահատական: Նույն մարդու արտահայտությունների մեջ տեղ է գտնում նաև մի հայտարարաություն` «սպասում ենք, որ Նահանգային գլխավոր խորհրդի անդամները կհրաժարվեն եկեղեցին վերանորոգելու որոշումից»: Մեկ այլ թերթում թերթի սյունակագիրը մեր լռության պատճառով որոշմանը կողմ քվեարկությունը որակում է որպես «արևելյան խորամանկություն»: Թերի տեղեկությամբ, առանց մեզ հետ կապ հաստատելու՝ կատարված հայտարարությունները բոլորիս հանդեպ անհիմ է: Այս որոշման մեջ գաղտնի ձեռքը չի կարող խոսակցության առարկա լինել: Բոլորս  իրար ճանաչում ենք: Մեր քաղաքի տարբեր շրջաններից ընտրվել և եկել ենք այստեղ, մենք ներկայացնում ենք ժողովրդին: Մեր կայացրած որոշումների մեջ ոչ մի գաղտնի, նպատակաուղղված ձեռք չի կարող դերակատարություն ունենալ: Ասում եմ, որ այս սխալ գնահատականները մեզ նեղացնում են: Մեր հանձնաժողովի զեկույցում տեղ գտած  և մեր խորհրդի կայացրած որոշման հանգամանքները նպատակ չունեն ո’չ եկեղեցի կառուցելու, վերաբացելու, և ո’չ էլ կրոնական զգացումները սասանելու»:

Քարաքուրթը հանձնաժողովի զեկույցի կետերը պարզաբանում է հետևյալ կերպ. «1941 թ. կատարված պեղումները քանի որ մակերեսային են եղել, և հրապարակի խորությունն ուսումնասիրել հնարավոր չէր, խորքային փորելու աշխատանք կատարելու հարցի վերաբերյալ ծանուցում ուղարկեցինք նախարարություն: Նախկինում շրջանի համար պատրաստված նախագծի աշխատանքները չէին արտացոլում շրջանի առաջնահերթությունը, և բավականաչափ ուշադրություն չէր դարձվում շրջանի իրականության վրա: Գնահատելով շրջանի քարանձավները, լեռնագնացությունը և հատկապես կրոնական զբոսաշրջության համար շրջանի եկեղեցիները` նախագիծ կազմեցինք և շրջանի ողջ ներուժն ի հայտ բերելու համար մանրակրկիտ աշխատանքներ կատարելու համար սարքավորումներով հագեցած տեխնիկա և խումբ պահանջելու վերաբերյալ դիմեցինք նախարարությանը: Փոքր տիպի ենթակառուցվածքներին ֆինանսական աջակցություն ծրագրին, որը բացվելու է Միջին սևծովյան զարգացման գործակալության կողմից, պատրաստել և ներկայացրել ենք ճանապարհների, գետահովտի բարեկարգման, հանգստի գոտու վերաբերյալ նախագիծ»:

Ազգայնական շարժում կուսակցության խմբակցության փոխնախագահ Մուհամնեդ Բեքթաշն ասում է` «Խստագույնս դեմ ենք»

Ազգայնական շարժում կուսակցության խմբակցության փոխնախագահ Մուհամմեդ Բեքթաշը, ում Նահանգային գլխավոր խորհրդի նախագահը նիստի ժամանակ ելույթի հնարավորություն չէր տվել, ժողովից հետո իր աշխատասենյակում կազմակերպած մամլո ասուլիսի ժամանակ պաշտպանեց այն տեսակետը, թե եկեղեցիները վերանորոգելու աշխատանքները մեծացնում են միսիոներական գործունեությունը: Մուհամմեդ Բեքթաշը, խստագույնս դեմ արտահայտվելով Սամսունում եկեղեցի վերանորոգելու աշխատանքներին, ասաց. «Մենք այս հարցում զգայուն ենք: Թուրքիայում եկեղեցիների վերանորոգումը մեծացնում է միսիոներական գործունեությունը: Աղթամար եկեղեցին (Աղթամար կղզու Սուրբ Խաչ եկեղեցի-Ակունքի խմբ.), Մարիամ Աստվածածին եկեղեցին 70 տարի անց բացվեցին ծիսական արարողության համար: Մարիամ Աստվածածին եկեղեցում նույնիսկ պատարագ մատուցվեց: Մենք մշտապես կողմ ենք Սամսունում ճիշտ ներդրումներ կատարելուն: Սակայն չենք հասկանում, թե ինչ կարիք կա Թեքքեքյոյում եկեղեցի վերանորոգել, երբ մարդիկ  բազմաթիվ կարիքներ ունեն: Վերանորոգման ծախսերի 51 տոկոսը վճարելու է Թեքքեքյոյի քաղաքապետարանը, իսկ մնացած մասը`49 տոկոսը` Նահանգային գլխավոր խորհուրդը: Ոչ ոք չգիտի, թե այդ 49 տոկոսը որքան է կազմելու: Եթե Նահանգային գլխավոր խորհրդի բյուջեն նման տեղերում վատնենք, ապա վաղը քաղաքացիների կույուղու և խմելու ջրի հարցն ինչպե՞ս ենք լուծելու: Ես, որպես Ազգայնական շարժում կուսակցության խմբակցության փոխնախագահ, Գյուղերին օգնություն ցուցաբերելու հանձնաժողովում եմ և գնում եմ Սամսունի զանազան գյուղեր: Չամուրունում ձյուն-ձմեռ հաշվի չառնելով՝ 7-8 տարեկան աղջիկ-երեխաները ոտքով  են գնում դպրոց: Ցավոք, Արդարություն և զարգացում կուսակցության խմբակցության փոխնախագահն ասում է, որ «չկա գյուղ, որտեղ ճանապարհ կառուցված չլինի»: Կան վայրեր, որտեղ կապ, կամուրջ, խմելու ջուր չկա: Նմանատիպ ծառայությունների կարիք ունենալու դեպքում չենք կարող հասկանալ եկեղեցի վերանորոգելու անհրաժեշտությունը, խստագույնս դեմ ենք: Մամուլում բավական քննարկվել է, սյունակագիրներն իրենց մեկնաբանություններն են կատարել, չկարողացա հասկանալ նաև սյունակագիրներին քննադատելու տրամաբանությունը: Միության նախագահ անվանված անձը Թուրք օջախների նախագահ դոկտոր, պրոֆեսոր Քայա Թունջեր Չաղլայան է: Այս հարցի վերաբերյալ բավականին տեղեկացված է: Մենք, որպես Ազգայնական շարժում կուսակցության խմբակցություն, աջակցում ենք այս հայտարարությանը: Մյուս սյունակագիրների  մեկնաբանություններն էլ ենք ողջունում: Սամսունում եկեղեցի վերանորոգելու կարիք չկա, մենք խստագույնս դեմ ենք»:

(DY-SLH-Y)

http://www.haber01.com/kiliselerin-onarimi-sorun-oldu-h36865.html