Ֆռֆռքար, Ֆերֆերկար, Ֆըռֆըռքար, Ֆըրֆըրքար, Ֆրֆրքար, լեռ Հայկական լեռնաշխարհում, Սասունի Տալվորիկի գավառակում, Մուշ քաղաքից 35 կմ հարավ-արևմուտք, Անդոկ լեռան շրջանում, Խլհովիտ գյուղի հյուսիային կողմում, Բաթման գետի վերին հոսանքի աջ կողմում։ Սրա արևմտյան փեշերին էր գտնվում Տալվորիկ գյուղը։ Լերկ ժայռերի վեր խոյացող քարակույտ է, որի վրա տեղ-տեղ բուսել են ծառեր ու թփեր։ Սրա ծայր գագաթին շարունակ սուլոց դղրդյուն է լսվում, որի համար էլ անվանել են Ֆռֆռքար։ Լեռան վրա կար քարայր, ուր վտանգի ժամանակ ապաստանում էին Տալվորիկի շրջանի բնակիչները։
Ֆռֆռքարը Փուրխ գյուղից դեպի հյուսիս երեք կիլոմետր հեռավորությամբ գտնվող Հոսնուտ գյուղ տանող ճանապարհն անցնում էր Տալվորիկի ջրի աջ ափով։ Ժայռոտ,անանցանելի մի ճանապարհ էր դա։ Այդ ճանապարհի կեսին ժայռերից դուրս 8֊10մ բարձրությամբ միակտոր քար էր ցցված,որի տակով մարդ ահով էր անցնում։ Այն կոչվում էր “Ֆռֆռքար”,որին դիպչող մշտական քամին “ֆըռֆըռ” ձայն էր հանում։ Այստեղից էլ անվանումը։
Տալվորիկի ջրի այդ անդնդախոր ձորի բարձր եզերքի վրայից`Ֆռֆռքարից երևում էր Սատանի կամուրջը։ Անառիկ Ֆռֆռքարը կարևոր դիրք էր հանդիսանում`հսկելով Սատանի կամրջի ուղղությամբ Տալվորիկ մտնող միակ ճանապարհը։ Դեպի ձորն ընկած բազմաթիվ ծառեր կային, որոնք աճում էին ժայռերի ճեղքերում։ Մարդ զարմանում էր, թե ապառաժ, գրեթե հողազուրկ ժայռերից ինչպես էին սնվում այդ ծառերը։ Հոսնուտ գնալիս ճամփորդը չպիտի շփոթեր աջ ու ձախ ոտնատեղերը, հակառակ դեպքում անդունդը կարող էր գլորվել։ Անփորձ ճամփորդը միշտ սրտի դողով էր անցնում,մինչև հասնում էր Հոսնուտ գյուղը։
ՎԱՐԴԱՆ ՊԵՏՈՅԱՆ
Սասունի և Տարոնի Պատմաաշխարհագրական Տեղագրությունը
Leave a Reply