Թուրքիան աֆրիկյան պետություններում 44 դեսպանություն ունի

Թուրքական մեդիայում շրջանառվում են Թուրքիայի և աֆրիկյան պետությունների միջև առկա հարաբերություններին վերաբերող վիճակագրական տվյալներ:

Դրանց համաձայն՝ 2002-ի համեմատ 2024-ին 32-ով ավելացել է աֆրիկյան պետություններում Թուրքիայի դեսպանությունների թիվը՝ հասնելով 44-ի:

Աճել է Թուրքիայում աֆրիկյան պետությունների դիվանագիտական ներկայացուցչությունների թիվը ևս: Եթե 2008-ին դրանք 10-ն էին, ապա 2024-ի դրությամբ հասել են 38-ի:

Զուգահեռաբար ընդգծվում է, որ դիվանագիտական կապերի հետզհետե խորացումը մի շարք հաջողությունների պատճառ է դարձել հատկապես քաղաքական, տնտեսական և մշակութային ոլորտներում:

Անդրադարձ կա նաև քաղաքական շփումներին: Նշվում է, որ վերջին 5 տարում աճել են փոխադարձ բարձր մակարդակի այցերը՝ հասնելով 500-ի:

Ընդգծվում է, որ միայն Էրդողանը պաշտոնյայի կարգավիճակում 53 այցելություն է ունեցել աֆրիկյան 31 տարբեր երկիր:

Թուրքիայի և աֆրիկյան պետությունների միջև աճող երկկողմ հարաբերությունների համատեքստում շեշտվում է նաև ընդհանուր առևտրաշրջանառության աճը:

Ըստ այդմ՝ եթե 2002-ին աֆրիկյան պետությունների հետ իրականացված առևտրաշրջանառությունը կազմում էր 4.3 մլրդ դոլար, ապա 2024-ի տարեվերջի դրությամբ, աճելով 9 անգամ, այն կազմել է 36.6 մլրդ դոլար:

https://www.ermenihaber.am/am/news/2025/08/05/%D4%B9%D5%B8%D6%82%D6%80%D6%84%D5%AB%D5%A1-%D4%B1%D6%86%D6%80%D5%AB%D5%AF%D5%A1/311572