Հայաստանի փոքրիկ պատկերավոր «դեսպանը» կրկին գնում է «ճամփորդության». «ԵՎՐՈՊԱ» նամականիշերի միջազգային մրցույթին այս տարի ևս Հայաստանը կներկայանա հետաքրքիր, տարբերվող և երկրի հարուստ ու յուրօրինակ ժառանգությունը ներկայացնող նամականիշով: Այս մրցույթը ևս մեկ անգամ Հայաստանը դարձնում է նամականիշների սիրահարների ուշադրության կենտրոն: Հայաստանը ներկայացնող նամականիշի օգտին կարող է քվեարկել յուրաքանչյուր անձ:
«Արմենպրես»-ի հետ զրույցում «Հայփոստ» ընկերության Ֆիլատելիայի վարչության ղեկավար Աննա Բարխուդարովան ընդգծեց՝ յուրաքանչյուր նամականիշ պատկերում է տվյալ երկրի մշակույթը, ժառանգությունը և տարբեր ոլորտներում ունեցած ձեռքբերումները:
«Եթե ուսումնասիրենք Հայաստանի նամականիշները, կտեսնենք, որ դրանք անմիջական կապ ունեն մեր պատմության և մշակույթի հետ։ Մենք նամականիշներն անվանում ենք երկրի պատկերավոր «դեսպաններ», որոնք շրջում են ամբողջ աշխարհով՝ ճանաչելի դարձնելով մեր հարուստ ժառանգությունը։ Հաճախ ենք ասում՝ ինչպես զինանշանը կամ դրոշը, այնպես էլ նամականիշը որոշ չափով երկրի ինքնության մի մասն է»։
«ԵՎՐՈՊԱ» նամականիշների ամենամյա միջազգային մրցույթ
Վարչության ղեկավարն ընդգծեց՝ «Հայփոստ» ընկերությունը, լինելով Հայաստանում նամականիշ թողարկող միակ ընկերությունը, մեծ նշանակություն է տալիս նամականիշների միջազգային մրցույթներին, որոնց թվում իր ուրույն տեղն ունի «ԵՎՐՈՊԱ»-ն:
«Յուրաքանչյուր տարի մրցույթի թեման տարբեր է։ Այս տարի մրցույթի թեման է «Ազգային հնագիտական հայտնագործություններ»-ը: Հայաստանը մասնակցում է 400 ՀՀ դրամ անվանական արժեք ունեցող նամականիշով, որի վրա պատկերված է հեղման անոթ (մ.թ.ա. XIX–XVIII դդ.)՝ հայտնաբերված Քարաշամբի դամբարանադաշտի պեղումներից։ Այն օգտագործվել է գինու հեղման համար՝ ծիսական արարողությունների ընթացքում»,-ասաց նա:
Նամականիշի դիզայներ Վահագն Մկրտչյանի խոսքով՝ նման նամականիշ պատրաստելը միայն գեղարվեստական գործընթաց չէ, այն նաև ուսումնասիրման և նոր գիտելիքների ձեռքբերման հնարավորություն է.
«Նամականիշ ստեղծելիս յուրաքանչյուր մանրուք պետք է ճշգրտված լինի։ Դրա համար մենք աշխատում ենք պատմաբանների, հնագետների և ոլորտի մասնագետների հետ, որպեսզի ներկայացվող պատկերներն ու տեղեկությունները լիովին հավաստի լինեն։ Դա ոչ միայն դիզայնի, այլև ուսումնասիրման և մշակութային պատասխանատվության գործընթաց է»,-նշեց դիզայները։
«Այդ անոթի վրա տեսնում ենք տիեզերքի մի շարք խորհրդանիշներ, որոնք վկայում են դարաշրջանի հավատալիքների ու աշխարհընկալման մասին: Նամականիշը թողարկվել է Եվրոպայի փոստային օպերատորների ասոցիացիայի (ՓոստԵվրոպա) անդամ երկրների «ԵՎՐՈՊԱ» ամենամյա միջազգային մրցույթի շրջանակներում», – ասաց Մկրտչյանը՝ նշելով, որ Հայաստանը «ԵՎՐՈՊԱ» մրցույթում մշտապես պատվավոր հորիզոնականներ է զբաղեցրել։
«2019 թվականին Հայաստանի նամականիշը, որի վրա պատկերված էր գյուղական ծիծեռնակ, զբաղեցրել է առաջին տեղը, իսկ 2020 թվականին Գյումրին պատկերող նամականիշն արժանացել է երկրորդ պատվավոր հորիզոնականի։ «Լիահույս ենք, որ մեր հայրենակիցների ակտիվ քվեարկության արդյունքում մենք կրկին հնարավորություն կունենանք գրավել բարձր հորիզոնական»,-ընդգծեց նամականիշի հեղինակը։
Քվեարկությունը բաց է մինչև 2025 թվականի սեպտեմբերի 9-ը։ Դրա համար անհրաժեշտ է մուտք գործել մրցույթի պաշտոնական էջ, լրացնել տվյալները (անուն, ազգանուն, էլեկտրոնային փոստի հասցե և երկիր), ընտրել Հայաստանի նամականիշը և սեղմել «Submit» կոճակը։
Նամականիշների թեմաների ընտրություն
«Հայփոստ» ընկերության Ֆիլատելիայի վարչության ղեկավար Աննա Բարխուդարովան, անդրադառնալով նամականիշների թեմաների ընտրությանը, նշեց, որ այն կատարվում է ՀՀ բարձր տեխնոլոգիական արդյունաբերության նախարարության ներքո գործող Փոստային վճարման պետական նշանների հարցերով խորհրդի կողմից։
«Ամեն տարի տարբեր գերատեսչություններից ստացվում են թեմաների բազմաթիվ առաջարկներ։ Խորհուրդը, որի անդամ է նաև «Հայփոստ»-ի գլխավոր գործադիր տնօրենը, հաստատում է տվյալ տարվա թողարկման պլանը՝ համաձայն որոշակի չափանիշների, որից հետո ֆիլատելիայի բաժինը սկսում է իր բուռն աշխատանքները՝ հավաքելով նյութեր, մշակելով յուրօրինակ դիզայն և ուղարկելով այն արտասահմանյան լավագույն տպարաններ։ Մի քանի շաբաթ անց նամականիշները հասնում են Հայաստան և դրվում շրջանառության մեջ՝ հաճախ մարման պաշտոնական արարողությամբ»,- ասաց Բարխուդարովան:
Ֆիլատելիայի նորարարական զարգացումը
Ֆիլատելիայի վարչության ղեկավարն անդրադարձավ նաև վերջին տարիներին ֆիլատելիան երիտասարդացնելու ուղղությամբ «Հայփոստ»-ի ձեռնարկած քայլերին՝ նշելով, որ 2021 թվականին թողարկվեց Հայաստանի առաջին թափանցիկ նամականիշը։
«Նույն տարում թողարկվեց նաև եզակի գեղաթերթիկ՝ նվիրված Առնո Բաբաջանյանի ծննդյան 100-ամյակին․ դրա վրա տեղադրված ARLOOPA հավելվածի նշանը հնարավորություն է տալիս լսել «Նոկտյուրն» ստեղծագործությունը հենց կոմպոզիտորի կատարմամբ։ Այդ թողարկմանը հաջորդեց Հայաստանի Սիմֆոնիկ նվագախմբի հետ համագործակցությունը, արդյունքում ստեղծվեց նամականիշների առաջին ձայնային բուկլետը՝ «Անվանի երաժիշտներ»-ը: Յուրաքանչյուր նամականիշ սկանավորելով՝ հնարավոր է ունկնդրել տվյալ կոմպոզիտորի ստեղծագործություններից մեկը։ Վերջին տարիներին հատկապես Ամանորին նվիրված նամականիշները թողարկվում են հատուկ էֆեկտներով՝ լուսային, հոլոգրաֆիկ: 2024 թվականին թողարկվեց նաև Հայաստանի առաջին ոսկյա նամականիշը՝ նվիրված Շառլ Ազնավուրի ծննդյան 100-ամյակին»,-ասաց Աննա Բարխուդարովան:
Նրա խոսքով՝ «Հայփոստ»-ը չի մոռանում նաև փոքրիկ ընթերցողների մասին. նախորդ տարի թողարկել է «Նամականիշների զարմանահրաշ աշխարհում» պատկերագիրքը։ 20 էջից բաղկացած գրքում ներկայացված է, թե ինչ է ֆիլատելիան, ով է ֆիլատելիստը, տրվել են նմանատիպ այլ հարցերի պատասխաններ։ Գրքում տեղ է գտել նաև Հայաստանի առաջին նամականիշը, մանկական մուլտֆիլմերին նվիրված թողարկումներ և բազմաթիվ հետաքրքիր տեղեկություններ։ «Լիահույս ենք, որ նմանօրինակ ծրագրեր առաջիկայում նորից կիրականացվեն, քանի որ դրանք միտված են Հայաստանում գեղեցիկ և ինտելեկտուալ այս հոբբիի երիտասարդացմանը»,- նշեց Բարխուդարովան։
Ինչպե՞ս դառնալ ֆիլատելիստ
Իսկ թե ինչպե՞ս դառնալ ֆիլատելիստ, վարչության ղեկավարն ընդգծեց՝ նամականիշներով հետաքրքրվողների համար առաջին քայլը «Ֆիլատելիայի անկյուն» խանութ-սրահ այցելելն է, որը գտնվում է Նալբանդյան 28 հասցեում։ Այստեղ մասնագետները կօգնեն ծանոթանալ նամականիշներին, ֆիլատելիստական հավաքածուներին ու սպասվող նորություններին։ Նամականիշները հասանելի են նաև օնլայն՝ Stamps.am կայքում, որտեղ հնարավոր է ծանոթանալ բոլոր թողարկված նամականիշներին և ցանկության դեպքում կատարել գնումներ։
Leave a Reply