«Աղթամար, պատարագ Սուրբ խաչ եկեղեցում մեկ դար անց՝ սեպտեմբերի 19-ին: Հրավիրում ենք մասնակցել մեզ հետ, գինը՝ 155 հազար դրամ»։
Այս հայտարարությունը տեղադրված է «Նարեկավանք Տուր» տուրիստական ընկերության պաշտոնական կայքում։ Փորձեցինք հետաքրքվել՝ այն դեպքում, երբ թուրքական իշխանությունները որոշում են կայացրել եկեղեցու վրա խաչ չտեղադրել, իսկ Մայր Աթոռն էլ որոշել է հոգևորականներ չուղարկել Վան, ընկերությունն իրականացնելո՞ւ է իր ծրագիրը։
«Նարեկավանք Տուր»-ի տնօրեն Աշոտ Սողոմոնյանը նախ չցանկացավ պատասխանել Tert.am-ի հարցերին՝ նշելով, թե «առավոտվանից ինձ չորս լրագրող արդեն զանգել է, ոչ մեկին չեմ պատասխանել։ Ես չեմ պատասխանում, դա իմ իրավունքն է»։
Սակայն շատ պնդելու արդյունքում պարոն Սողոմոնյանը, այնուամենայնիվ, համաձայնեց որոշ տեղեկություններ տրամադրել։
«Ուզում եք իմանալ՝ տանո՞ւմ եմ պատարագին, թե՞ չէ, չեմ տանում, չեղյալ եմ համարել։ Պատրաստվում էի 200 հոգի տանել, մի ամբողջ հյուրանոց էի բրոնիա արել, բայց չեմ տանի։ Ինչպես իմ երկիրը որոշի, այնպես էլ կանեմ»,- նշեց Սողոմոնյանը։
Նշենք, որ հայաստանցիների մեծ մասը, այդ թվում՝ քաղաքական և հասարակական գործիչներից շատերը, կարծում են, որ հայերը չպետք է մասնակցեն թուրքական կողմի կազմակերպված այդ շոուին։ Tert.am-ի կայքում տեղադրված «Ինչպե՞ս եք վերաբերվում Աղթամարի Սուրբ խաչ եկեղեցում պատարագի մատուցմանը» հարցին կայքի այցելուների մեծամասնությունը պատասխանել է, որ դա թուրքական շոու է, և հայերը չպետք է մասնակցեն դրան։
Նշենք, որ Արևմտյան Հայաստան զբոսաշրջային այցեր կազմակերպող մի քանի այլ ընկերություններից չհաջողվեց տեղեկատվություն ստանալ՝ նախօրոք հայտարարված Վան կատարելիք ուղևորությունները հետաձգելո՞ւ են, թե՞ ոչ։ Մասնավորապես, «Անի Տուր» և «Տեզ Տուր» ընկերությունների տնօրենների հետ կապվել չհաջողվեց, նրանք աշխատակիցների միջոցով խորհուրդ տվեցին զանգել ավելի ուշ։
Tert.am
08.09.10
Leave a Reply