Արդվինի Առևտրի բորսայի ղեկավար խորհրդի նախագահը հանդիպել է Զարեհ Սինանյանի հետ

Արդվինի Առևտրի բորսայի ղեկավար խորհրդի նախագահ Օսման Աքյուրեքը Հայաստան կատարած այցի շրջանակներում հանդիպել է ՀՀ Սփյուռքի գործերի գլխավոր հանձնակատար Զարեհ Սինանյանի հետ։

Այդ մասին, www.akunq.net – ի փոխանցմամբ, գրում է «Ռիզեի ձայնը» լրատվական կայքէջը։

Աղբյուրի համաձայն՝ հանդիպմանը քննարկվել է Հայաստանի և Թուրքիայի միջև տնտեսական հարաբերությունների զարգացման հնարավորությունների հարցը։

Նախագահ Աքյուրեքն անդրադառնալով այդ հանդիպմանը՝ նշել է, որ Ալիջանի սահմանադռան բացումը կարող է նպաստել առևտրական հարաբերությունների զարգացմանը, և որ այդ ուղղությամբ ձեռնարկվող քայլերը համագործակցության նոր հնարավորություններ կստեղծեն Արդվինի և Սևծովյան շրջանի ձեռնարկությունների համար։

Աղբյուրը նաև հաղորդում է, որ հանդիպման շրջանակներում կողմերը հույս են հայտնել, որ իրենց երկրները դիվանագիտական հարաբերություններ կզարգացնեն, դեսպանատներ կբացեն և քայլեր կձեռնարկեն ազատ առևտրի մասին պայմանավորվածություններ ձեռք բերելու ուղղությամբ։

Նախագահ Աքյուրեքն արձանագրել է, որ Անկարայի և Երևանի միջև հարաբերությունների զարգացման դրական դինամիկայի դեպքում տնտեսական հարաբերություններն էլ ավելի կամրապնդվեն։

https://www.rizeninsesi.net/artvinden-ermenistana-ticaret-koprusu-1791814446-4314670

Թարգմանեց Մելինե Անումյանը

www.akunq.net