Գիտնականը նոր տվյալներ է հրապարակել Նոյյան տապանի որոնումների արդյունքների վերաբերյալ

Նոյյան տապանի ուսումնասիրության ղեկավար, պրոֆեսոր Ջենկեր Աթիլան հայտարարել է Արարատ լեռան մոտ գտնվող Դուրուփընար երկրաբանական կազմավորման շրջանում նոր տվյալների ձեռքբերման մասին, սակայն ընդգծել է, որ դեռևս վաղաժամ է պնդել տապանի հայտնաբերման մասին։

Հետազոտական ​​խումբը դաշտային աշխատանքները սկսել է հունիսի 28-ին։ Մասնագետները կատարել են ֆորմացիայի եռաչափ մոդելավորում, GPS չափումներ, տարածքի քարտեզագրում և ստորգետնյա կառույցների ռադարային սկանավորում։ Նախատեսվում է վերլուծել ընդհանուր առմամբ մոտ 1000 հողի նմուշ։

«Մենք Դուրուփընար երկրաբանական կազմավորման շրջանում  բազմաթիվ անոմալիաներ հայտնաբերեցինք։ Դրանցից մի քանիսը դատարկություններ են, և ուղիղ անկյան տակ հատվող անոմալիաների առկայությունը հարց է առաջացնում, թե արդյոք այստեղ կարող էր գտնվել նավի ներքին մասը»,- Աթիլայի խոսքերն է մեջբերում NTV-ն։

«Մենք նաև հողի նմուշներ վերցրեցինք։ Ենթադրաբար ներքին հատվածից վերցված նմուշներում ածխածնի պարունակությունը 40%-ով ավելի բարձր էր, քան արտաքին հատվածից վերցված նմուշներում։ Սա ենթադրում է օրգանական նյութի կամ փայտային մնացորդների առկայություն, սակայն վերջնական արդյունքները հայտնի կլինեն վերլուծությունն ավարտվելուց հետո», – հավելեց նա։

Աթիլան նշել է, որ լաբորատոր փորձարկումների վերջնական արդյունքները սպասվում են երկու-երեք ամսվա ընթացքում։ Նրա խոսքով՝ ներկայիս տվյալները թույլ են տալիս միայն հետագա ուսումնասիրություններ կատարել այս տարածքում Նոյան տապանի մնացորդների առկայության հնարավորության վերաբերյալ։

Հետազոտողը Նոյյան տապանի ենթադրյալ հայտնաբերման մասին արտասահմանյան լրատվամիջոցների հաղորդագրությունները մոլորեցնող է անվանել։ Նա նշել է, որ հետազոտությունները դեռևս շարունակվում են, և ներկայում դրա հայտնաբերման հաստատում չկա։

https://www.panorama.am/am/news/2026/09/27/%D5%86%D5%B8%D5%B5%D5%B5%D5%A1%D5%B6-%D5%BF%D5%A1%D5%BA%D5%A1%D5%B6/3169787