Սեբաստիայի՝ (թուրք․ պաշտոնական անունը՝ Սիվաս-Ակունքի խմբ․) այլ եկեղեցիների համեմատ կանգուն մնալ հաջողած Սուրբ Գևորգ հայկական եկեղեցին, որը բնակիչների շրջանում հայտնի է Տավրոսի գետակի եկեղեցի, պահպանման կարիք ունի։
Այդ մասին, www.akunq.net –ի փոխանցմամբ, հայտնում են տեղի թուրքական լրատվամիջոցները։
Աղբյուրի համաձայն՝ Սեբաստիա նահանգում անցյալում գոյություն ունեցած տասնյակ եկեղեցիներից մեր օրեր հասած գրեթե միակ եկեղեցին Սուրբ Գևորգն է, որը կարողացել է դիմակայել բնության արհավիրքներին ու ժամանակի փորձություններին։ 19-րդ դարում սեբաստահայության կողմից որպես Հայ առաքելական եկեղեցու հավատքի տաճար կառուցված սույն եկեղեցին գրավոր աղբյուրներում հանդիպում է նաև Սուրբ Սարգիս անունով։
Որոշ ժամանակ եկեղեցին օգտագործել են նաև տեղի հույները, որի պատճառով այն հայտնի է եղել նաև որպես «հունական եկեղեցի»։ Հետագա տարիներին այս հավատքի տաճարը Թուրքիայի զինուժի կողմից օգտագործվել է որպես ռազմապահեստարան։
2016 թ․ Թուրքիայի իշխանությունները որոշել են վերականգնել այն։ Եկեղեցու վերականգման նախագիծն արժանացել է Սեբաստիայի մշակութային հարստությունների պահպանման շրջանային խորհրդի հավանությանը։ Թեև այդ ժամանակաշրջանում Սեբաստիայի նահանգապետ Սալիհ Այհանը հայտարարել է վերականգնողական աշխատանքների մեկնարկի մասին, սակայն այս 10 տարիների ընթացքում կոնկրետ աշխատանքներ չեն իրականացվել այդ ուղղությամբ։ Նախատեսվում է, որ եկեղեցին կվերականգնվի իր նախկին տեսքով և կօգտագործվի՝ այդ վայրերում զբոսաշրջությունը զարգացնելու նպատակով։
Թարգմանեց Մելինե Անումյանը
Leave a Reply