Թուրքիայում հետաքննություն է սկսվել «Էրդողանը մահացել է» վերնագրով լուրի հրապարակումից հետո

Թուրքիայի Այդըն նահանգի դատախազությունը հետաքննություն է սկսել տեղական թերթի ֆեյսբուքյան էջում «Էրդողանը մահացել է» գրությամբ լուսանկարի հրապարակումից հետո, հայտնում է OdaTV-ն։

Որոշ ժամանակ անց պարզվել է, որ հրապարակումը վերաբերում էր Գյուլշեն Էրդողան անունով տեղացի կնոջ մահվանը։

Օգոստոսի 25-ին Denge Gazetesi թերթի ֆեյսբուքյան էջում հայտնվել էր սև ֆոնով լուսանկար, որի վրա դեղին ու սպիտակ տառերով գրված է եղել «Էրդողանը մահացել է»։

Սակայն հղումով անցնելիս բացվում է Գյուլշեն Էրդողան անունով կնոջ մահվան մասին լուրը, այսինքն՝ խոսքն ամենևին էլ Թուրքիայի նախագահ Ռեջեփ Թայիփ Էրդողանի մասին չի եղել։

Հրապարակման մասին ահազանգ ստանալուց հետո Այդընի դատախազությունը հետաքննություն է սկսել Թուրքիայի քրեական օրենսգրքի 217/Ա հոդվածով («Ապակողմնորոշող տեղեկատվության հանրային տարածում»)։

Քննության շրջանակում պարզվել են հրապարակման համար պատասխանատու աշխատակիցների անունները՝ լրատվամիջոցի ներկայացուցիչ Էմին Այդընը, պատասխանատու խմբագիր Եշիմ Ուլքենը և թղթակից Իսլամ Քելեշը։

Թուրքական OdaTV պարբերականի տվյալներով՝ լրագրողները ձերբակալվել են։

https://news.am/hy/news/1057702