ԱՄՆ նախագահ Դոնալդ Թրամփն արդեն ցույց է տվել, որ ամերիկյան առաջնորդությունը կարող է ձևավորել Հարավային Կովկասի ապագան։ Այս շաբաթ ՆԱՏՕ-ի առաջնորդների գագաթնաժողովին մասնակցելու համար Թուրքիա կատարելիք այցից հետո նա պետք է կիրառի նույն պրագմատիկ մոտեցումը՝ նպաստելու հայ-թուրքական սահմանի բացմանը և ամրապնդելու ԱՄՆ-ի դիրքերը ռազմավարական նշանակություն ունեցող տարածաշրջանում, գրում է The Washington Times-ը։
Պարբերականի տվյալներով՝ 2025 թ. օգոստոսին Թրամփը Սպիտակ տուն էր հրավիրել Հայաստանի վարչապետ Նիկոլ Փաշինյանին և Ադրբեջանի նախագահ Իլհամ Ալիևին։ Դա հանգեցրել է «Թրամփի երթուղու» (Trump Route) կամ TRIPP-ի ստեղծմանը՝ գործնական նախաձեռնության, որը դիվանագիտությունը վերածում է նշանակալի տնտեսական հնարավորությունների թե՛ տարածաշրջանի, թե՛ Միացյալ Նահանգների համար։
Այժմ Թրամփը պետք է նույն մոդելն օգտագործի Թուրքիայի նախագահ Ռեջեփ Թայիփ Էրդողանի հետ փոխգործակցության մեջ։ Հայ-թուրքական սահմանի բացումը կօգնի խաղաղությունը վերածել իրական տնտեսական առաջընթացի և կապահովի Միացյալ Նահանգների ավելի ծանրակշիռ դերը ավելի կայուն Հարավային Կովկասում։
Ամերիկյան առաջնորդությունը կարող է ստեղծել նոր առևտրային հնարավորություններ ռազմավարական նշանակություն ունեցող տարածաշրջանում՝ առանց զորքեր ուղարկելու և առանց «դատարկ չեկեր» տրամադրելու։
Հայաստանին և Թուրքիային կապում է բարդ պատմություն։ 1915 թվականի իրադարձությունները մինչ օրս պահպանվում են աշխարհի տարբեր ծայրերում ապրող հայերի հիշողության մեջ։ Սահմանի բացումը չի ջնջի անցյալը, և ոչ մի հայ ղեկավար չի կարող մարդկանց խնդրել մոռանալ դրա մասին։ Ինչպես նշվում է հոդվածում, Հայաստանը և Թուրքիան պետք է ինքնուրույն համաձայնության գան, սակայն Թրամփը կարող է նպաստել դրան։
Leave a Reply