Ադրբեջանը որոշել է հերթական անգամ հերքել մարդկության դեմ իրագործված ամենաակնհայտ արյունալի հանցագործություններից մեկը՝ Օսմանյան կայսրությունում Հայոց ցեղասպանությունը՝ հրաժարվելով առերեսվել ճշմարտությանը։
Այս կապակցությամբ Ադրբեջանի ԱԳՆ-ն հանդես է եկել հերթական ջղաձիգ հայտարարությամբ՝ Ցեղասպանությունն անվանելով «մտացածին»։
Ոչ համարժեք արձագանքի պատճառ է դարձել, մասնավորապես, Նյու Յորքի քաղաքապետ Զոհրան Մամդանիի հայտարարությունը՝ Հայոց ցեղասպանության զոհերի հիշատակի 111-րդ տարելիցի կապակցությամբ։ Ավելին, Ադրբեջանի ԱԳՆ-ն Նյու Յորքի քաղաքապետից պահանջել է հեռացնել Հայոց ցեղասպանության մասին հայտարարությունը։
«Մենք մերժում ենք Ձեր սադրիչ հայտարարությունը։ Նման արտահայտությունները վկայում են պատմության և տարածաշրջանի իրողությունների թերի ըմբռնման մասին և խեղաթյուրում են փաստերը քաղաքական նպատակներով։ 2020 թվականին Ադրբեջանը գործել է իր միջազգայնորեն ճանաչված ինքնիշխան տարածքների սահմաններում՝ միջազգային իրավունքի և ՄԱԿ-ի Անվտանգության խորհրդի բանաձևերի համաձայն։
2023 թվականին իրականացված հակաահաբեկչական միջոցառումներն ավարտվեցին 30 տարվա ապօրինի օկուպացիայից հետո Ադրբեջանի սահմանադրական կարգի վերականգնմամբ։ «Բռնի տեղահանման» մասին պնդումներն անտեսում են այն փաստը, որ հայ բնակիչներին առաջարկվել է վերաինտեգրում, լիակատար իրավահավասարություն և անվտանգության երաշխիքներ։ Առանձնահատուկ մտահոգություն է առաջացնում այն, որ ընտրված պաշտոնյան, անտեսելով օկուպացիայի ժամանակաշրջանում հարյուր հազարավոր ադրբեջանցիների դեմ իրականացված էթնիկ զտումներն ու զանգվածային սպանությունները, ինչպես նաև մշակութային և կրոնական ժառանգության ոչնչացումը, առաջ է մղում միակողմանի նարատիվներ։ Նման անպատասխանատու հայտարարություններն անընդունելի են և պետք է անհապաղ հեռացվեն»,- հայտարարել է Ադրբեջանի ԱԳՆ մամուլի քարտուղար Այխան Հաջիզադեն։
Ինչպես նշել էր Զոհրան Մամդանին իր հայտարարության մեջ՝ հարգանքի տուրք մատուցելով Օսմանյան կայսրության կողմից ժամանակակից Թուրքիայի, Սիրիայի և Հայաստանի տարածքում սպանված 1,5 միլիոն հայերի հիշատակին, չի կարելի թույլ տալ պատմության կրկնությունը․
«2020 թվականին Ադրբեջանի և Թուրքիայի ռազմական ուժերը հարձակվեցին Լեռնային Ղարաբաղի հայ բնակչության վրա։ 2023 թվականին Ադրբեջանը Լեռնային Ղարաբաղից վտարեց ավելի քան 100,000 հայերի՝ շարունակելով ավելի քան 100 տարի առաջ սկսված ցեղասպանական արշավը»։
Leave a Reply