Թուրքագետներ ու արևելագետներ, պատմաբաններ, պետական ու քաղաքական գործիչներ, պաշտոնյաներ, բոլորն այսօր հավաքվել են մեկ հարկի տակ՝ մասնագիտական ու խորքային քննարկման։
«Հայոց ցեղասպանությունը և փոփոխվող տարածաշրջանը» խորագրի ներքո անցկացվող քննարկման գլխավոր նպատակը ոչ միայն պատմական հիշողությունը վառ պահելն է, այլև ժամանակակից քաղաքականության մեջ ժխտողականության դրսևորումներին գիտականորեն հակադրվելը։
«Տասնամյակներ շարունակ հայկական օրակարգի հասցեատերը միջազգային հանրությունն էր. մենք ապացուցում էինք, որ Ցեղասպանության հիշատակը ոչ թե անցյալի բեռ է, այլ ներկայի անվտանգության երաշխիք։ Այսօր, սակայն, իրավիճակը փոխվել է. հայացքն ուղղված է դեպի սեփական հասարակությունը»,-նշել է արտակարգ և լիազոր դեսպան Արա Այվազյանը։
Ի տարբերություն նախկինի՝ այսօրվա ցեղասպանագիտական օրակարգն ընդլայնվել է Արցախի հարցով։ Ցեղասպանագետների միջազգային ընկերակցության 2024 թ. բանաձևը, որը փաստում է Արցախում մարդկության դեմ հանցագործությունները, վկայում է՝ հիշողությունը կրկին դառնում է անվտանգային պայքարի արդիական գործիք։
Ցեղասպանագետների միջազգային ընկերակցության վերջին գնահատականները ցույց են տալիս, որ հայոց ցեղասպանության խնդիրը դարձել է շարունակական պատմություն, որն իրական արձագանք ու պաշտպանություն է պահանջում հենց այսօր։ Միաժամանակ, ցանկացած փորձ՝ ժխտողականության միջոցով մթագնելու պատմական ճշմարտությունը, ոչ միայն բարոյապես անընդունելի է, այլև ուղղակի սպառնալիք է նոր հանցագործությունների կանխարգելման գործում։
Leave a Reply