Ֆրանսիայի Անտոնի քաղաքում անցկացվել է Հայոց ցեղասպանության 111-րդ տարելիցին նվիրված պաշտոնական արարողություն։
«Արմենպրես»-ի հաղորդմամբ՝ այս մասին հայտնում են Ֆրանսիայում ՀՀ դեսպանությունից։
Նշվում է, որ միջոցառմանը մասնակցել է նաև Ֆրանսիայում ՀՀ դեսպան Արման Խաչատրյանը։
Միջոցառումը տեղի է ունեցել Ցեղասպանության զոհերի հիշատակը հավերժացնող ու հայ ժողովրդի վերածնունդը խորհրդանշող «Հայաստանի Արծիվ» հուշակոթողի առջև։
Հաղորդվում է, որ արարողությանը ելույթներով հանդես են եկել Ֆրանսիայում ՀՀ դեսպան Արման Խաչատրյանը, Ֆրանսիայի Կառավարության խոսնակ, էներգետիկայի հարցերով լիազոր նախարար Մոդ Բրեժոնը, Օ-դը-Սեն դեպարտամենտի նախագահ Ժորժ Սիֆրեդին, Անտոնիի քաղաքապետ Օդ Նոդե-Լանգլուան և փոխքաղաքապետ Վիսսամ Նեհմեն։
Դեսպանության փոխանցմամբ՝ արարողությանը մասնակցել են նաև այլ քաղաքապետեր, սենատորներ, պատգամավորներ, ֆրանսահայ համայնքային կառույցների ներկայացուցիչներ, բազմաթիվ ֆրանսահայեր և ֆրանսիացիներ։
Այնուհետև արարողության մասնակիցները և ներկաները ծաղկեպսակներ և ծաղիկներ են զետեղել «Հայաստանի Արծիվ» հուշակոթողի առջև։
Leave a Reply