Թուրքիան այս շաբաթ (02.03.26-06.03.26)

Քաղաքականություն- Էրդողան․ «Տարածաշրջանում լարվածությունը սարսափելի չափեր է ընդունել»

Թուրքիայի Հանրապետության նախագահ Ռեջեփ Թայիփ Էրդողանը Անկարայի Բեշթեփե թաղամասի Ազգային ցուցահանդեսի սրահում մարտի 5-ի երեկոյան հանդիպել է արվեստագետների և արհեստավորների հետ ու հայտարարություններ արել տարածաշրջանային վերջին իրադարձությունների վերաբերյալ։ Էրդողանը մասնավորապես նշել է․ «Մեր հարևան Իրանի դեմ օդային հարձակումների պատճառով լարվածությունը տարածաշրջանում սարսափելի չափի է հասել, իսկ Իրանի կողմից տարածաշրջանային մյուս երկրների վրա ուղարկված հրթիռների և ԱԹՍ-ների հետևանքով վտանգ կա, որ պատերազմը շատ ավելի լայն ընդգրկում ունենա»։ Թուրքիայի նախագահ Էրդողանը նաև նախազգուշացրել է՝ նշելով․ «Այն դեպքում, երբ առաջին իսկ օրվանից բացահայտ էր հանուն խաղաղության մեր պայքարը, ոչ ոք չպետք է բարի դրացիական և եղբայրական հարաբերություններն արատավորող դիրքորոշում ցուցաբերի»։ Հանդիպման վերջում Էրդողանը Ռամադան ամսվա կապակցությամբ մաղթել է, որ «այդ սուրբ օրերը բարիք բերեն համայն իսլամական աշխարհին»։

Միջազգային- Թուրքիայի արտգործնախարարության խոսնակը պատասխանել է Հունաստանի պաշտպանության նախարարին

Թուրքիայի արտաքին գործերի նախարարության մամլո խոսնակ Օնջյու Քեչելին պատասխանել է Հունաստանի Հանրապետության պաշտպանության նախարար Նիկոս Դենդիասի վերջին հայտարարությանը՝ «Հյուսիսային Կիպրոսի Թուրքական Հանրապետության» վերաբերյալ։ Նախարար Դենդիասն ասել էր, թե տարածաշրջանում տեղի ունեցող վերջին իրադարձությունները կարող են հիմք ստեղծել Կիպրոսից թուրքական զորքերը դուրս բերելու համար։ Թուրքիայի Հանրապետության արտգործնախարարության խոսնակը, ի պատասխան հայտարարել է, թե «Կիպրոսցի թուրքերը և Հյուսիսային Կիպրոսի Թուրքական Հանրապետությունը, նաև մայր հայրենիք և երաշխավոր Թուրքիայի աջակցությամբ, ի զորու են իրենց անվտանգությունն ապահովել և ոչ ոքի կարիքը չունեն»։

Ընդդիմություն- «Երջանկություն» կուսակցության առաջնորդ․«Թուրքիան երբեք չպետք է այս կեղտոտ խաղի մասը դառնա»

Թուրքիայում գործող «Երջանկություն» կուսակցության առաջնորդ Մահմուդ Արըքանը, մասնակցելով իր կուսակցության՝ Կաստամոնուի նահանգային կազմակերպության իֆթարի սեղանին և անդրադառնալով ԱՄՆ-ի և Իսրայելի՝ Իրանի դեմ հարձակումներին ու Թուրքիայի օդային տարածքում հայտնաբերված և վնասազերծված բալիստիկ հրթիռին, հայտնել է․ «Այդ հրթիռը և այս դեպքի շուրջ ծավալվող սցենարը բացահայտ ծուղակ է, որի հեղինակները նրանք են, ովքեր ցանկանում են պատերազմի մեջ ներքաշել մեր երկիրը։ Թուրքիան երբեք չպետք է այդ կեղտոտ խաղի մասը դառնա»։ Արըքանն անդրադառնալով ԱՄՆ-ի և Իսրայելի հարձակումներին՝ շեշտել է, որ ԱՄՆ-ն իրավունք չունի նման բան անել, և որ պետք է հստակ կերպով տարանջատել սպառնացողին և սպառնալիքի ենթարկվողին՝ տարածաշրջանում լարվածությունը սթափ ուղեղով վերլուծել կարողանալու համար։ Նա նաև անդրադառնալով Իրանից դեպի Թուրքիա սպասվող փախստականների նոր հոսքի թեմային՝ հավելել է, թե այդ նպատակով «Եվրոպան ցանկանում է որպես ապարատ օգտագործել Թուրքիան»։

Տնտեսություն- Թուրքիայի Արևելասևծովյան շրջանից արտահանումը գերազանցել է 231 միլիոն դոլարը

Թուրքիայի Տրապիզոն, Ռիզե, Արդվին և Գյումյուշհանե նահանգներից 2026 թ․ հունվար և փետրվար ամիսներին 231 միլիոն 183 հազար դոլարի չափով արտահանում է իրականացվել։ Արևելասևծովյան արտահանողների միության գրավոր հայտարարության մեջ նշված է, որ վերոնշյալ 2 ամիսներին Տրապիզոնից արձանագրվել է 142 միլիոն 580 հազար դոլարի, Ռիզեից՝ 51 միլիոն 265 հազար դոլարի, Գյումյուշհանեից՝ 25 միլիոն 854 հազարի, իսկ Արդվինից՝ 11 միլիոն 484 հազար դոլարի արտահանում։ Հայտարարության մեջ նաև նշվել է, որ տվյալ նահանգներից ամենաշատ արտահանումը կատարվել է մետաղների և հանածոների ոլորտում։ Ընդհանուր ապրանքներ են արտահանվել 100 երկիր։ Վերջիններիս շարքում առաջին տեղն է գրավում Ռուսաստանի Դաշնությունը, ապա՝ Կանադան, Վրաստանը, Իտալիան և Բուլղարիան։

Հասարակություն- Թուրքիայի «Քոչը» և «Հաջեթթեփեն»՝ աշխարհի լավագույն հիվանդանոցների շարքում

«Newsweek» ամսագիրը և Statista համաշխարհային տվյալների հարթակը պատրաստել են 2026 թ․ «Աշխարհի լավագույն 250 հիվանդանոցների ցանկը»։ Թուրքիայից 3 հիվանդանոց ընդգրկվել է այդ ցանկում։ Դրանք են Ստամբուլի «Քոչ» համալսարանի հիվանդանոցը (համարվել է 213-րդը), Անկարայի Հաջեթթեփե համալսարանի հիվանդանոցը (234-րդ) և Անատոլիայի առողջության կենտրոնը (248-րդ)։

Մշակույթ- Թուրքական սերիալներում մեծ թիվ են կազմում կնոջ դեմ բռնության տեսարանները

Սոցիալական հարցումներ իրականացնող BAREM ընկերության կատարած ուսումնասիրության համաձայն՝ 2014-2024 թթ․ հեռարձակված թուրքական հեռուստասերիալների մեծ մասում գերակշռում են կնոջ դեմ բռնության տեսարանները։ Մասնավորապես ուսումնասիրված 94 սերիալից 86-ում այդ տեսարանները մեծ թիվ են կազմում։ Գրեթե բոլորհեռուստասերիալներում առկա է ֆիզիկական և ֆինանսական բռնություն, 97 տոկոս սերիալներում՝ հոգեբանական բռնություն, իսկ 34 տոկոսում՝ սեռական։ Այնուամենայնիվ ամենահաճախը հանդիպում է հենց ֆիզիկական բռնությունը։

Պատրաստեց Մելինե Անումյանը

www.akunq.net