Թուրքիան «խորապես վշտացած է» եւ մտահոգված է ԱՄՆ-ի եւ Իսրայելի կողմից Իրանի դեմ իրականացված հարձակումներից, «որոնք սկսվել են (Իսրայելի վարչապետ) Նեթանյահուի սադրանքներից»,- շաբաթ օրը՝ փետրվարի 28-ին հայտնել է Թուրքիայի նախագահ Ռեջեփ Թայիփ Էրդողանը, տեղեկացնում են տեղի լրատվամիջոցները։
Թուրքիան խորապես ափսոսում է ԱՄՆ եւ Իսրայելի համատեղ հարձակումների առնչությամբ, «որոնք ակնհայտորեն խախտում են Իրանի ինքնիշխանությունը եւ սպառնում են բարեկամ եւ եղբայրական Իրանի ժողովրդի խաղաղությանը»,- ասել է Էրդողանը։
«Անկախ պատճառից՝ մենք անընդունելի ենք համարում Իրանի հրթիռային եւ անօդաչու թռչող սարքերի հարձակումները Պարսից ծոցի մեր եղբայրական երկրների դեմ»,- ընդգծել է Էրդողանը։
Եթե առողջ բանականությունը չհաղթի եւ դիվանագիտությանը հնարավորություն չտրվի, «մեր տարածաշրջանը կներքաշվի կրակի օղակի մեջ»,- նշել է նա։
«Հետագա արյունահեղությունը կանխելու եւ մեր տարածաշրջանն ավելի մեծ տառապանքներից ազատելու համար բոլոր կողմերը, հատկապես իսլամական աշխարհը, պետք է անհապաղ գործողություններ ձեռնարկեն»,- ավելացրել է Էրդողանը։
Նրա խոսքով՝ Անկարան անմիջապես կակտիվացնի դիվանագիտական ջանքերը՝ նախ հրադադար ապահովելու, ապա բանակցությունները վերսկսելու համար։
Իսրայելը եւ Միացյալ Նահանգները փետրվարի 28-ին, շաբաթ օրը, վաղ առավոտյան ավիահարվածներ են հասցրել Իրանին՝ վկայակոչելով «իրանական ռեժիմի» ենթադրյալ սպառնալիքը։
Հարվածները հասցվել են այն ժամանակ, երբ Օմանի գլխավորությամբ Վաշինգտոնի եւ Թեհրանի միջեւ ընթանում էին Իրանի միջուկային ծրագրի վերաբերյալ բանակցությունները։ Ժնեւում բանակցությունների նոր փուլն ավարտվել էր հինգշաբթի օրը։ Անցյալ տարվա հունիսին Իսրայելը 12-օրյա պատերազմ սկսեց Իրանի դեմ, որին ավելի ուշ միացավ նաեւ Միացյալ Նահանգները՝ ռմբակոծելով իրանական երեք միջուկային օբյեկտներ։
Leave a Reply