Քաղաքականություն- Էրդողան․ «Կենտրոնացած ենք մեր հասարակության բոլոր խավերի իրավունքներն ու ազատություններն ընդլայնելու հարցի վրա»
Թուրքիայի նախագահ Ռեջեփ Թայիփ Էրդողանը փետրվարի 25-ին ելույթ է ունեցել Անկարայի ազգային ցուցահանդեսում կազմակերպված իֆթարի շրջանակներում։ Էրդողանը մասնավորապես շեշտել է, որ Թուրքիայի ներկայիս իշխանությունները կենտրոնացած են պետության բոլոր խավերի իրավունքներն ու ազատություններն ընդլայնելու հարցի վրա։ Թուրքիայի նախագահն ընդգծել է կրոնի և խղճի ազատությունները պաշտպանելու կարևորությունը։ Նա նաև հիշեցրել է, որ աշխատավորների՝ ավելի անվտանգ պայմաններում աշխատանքն ապահովելու նպատակով իր իշխանությունը հրապարակել է Աշխատավորների առողջության և անվտանգության մասին օրենքը։
Իրադարձային- Դևլեթ Բահչելիից Էրդողանին նվեր և կարմիր վարդեր՝ տարեդարձի առթիվ
Իր ազգայնամոլական հայացքներով հայտնի Թուրքիայի Ազգայնական շարժում (Milliyetçi Hareket Partisi / MHP) կուսակցության առաջնորդ Դևլեթ Բահչելին փետրվարի 27-ին նշվող Թուրքիայի նախագահ Էրդողանի տարեդարձը շնորհավորել է կարմիր վարդեր և իսլամական երկրների քարտեզը ներկայացնող մի նկար ուղարկելով։ Այս տարի լրանում է Էրդողանի 72-ամյակը։ Դևլեթ Բահչելիի և Էրդողանի համար արդեն ավանդույթ է դարձել հատուկ օրերին միմյանց կարմիր վարդեր նվիրելը։ Բացի վարդերից՝ Բահչելին մի մեծ նկար է նվիրել Էրդողանին, որում ներկայացված են իսլամական պետությունները, վերևի հատվածում առկա է «Ալլահ», իսկ ներքևի մասում՝ «Սուրբ Մուհամմեդ» գրությունը։ Քարտեզում նշված են նաև «Ալ Ֆաթհ» սուրահի առաջին և երկրորդ այաթները։ Թուրքիայի Ազգային շարժում կուսակցության սոցիալական հարթակում հրապարակված լուրում նաև նշվում է, որ Բահչելին քաջառողջություն է մաղթել Էրդողանին։
Ընդդիմություն- Նոր բարօրություն կուսակցության առաջնորդ Ֆաթիհ Էրբաքան․ «Իրանից հետո հերթը կհասնի Թուրքիային»
Նոր բարօրություն կուսակցության առաջնորդ Ֆաթիհ Էրբաքանը Թուրքիայի Քոջաելի քաղաքում իր կուսակցության կողմից կազմակերպված իֆթարի սեղանին հայտարարել է, որ Թուրքիան կարող է հասնել այնպիսի վիճակի, երբ հնարավոր չլինի անգամ ընտրություններ կազմակերպել այստեղ, և որ հավանականություն կա՝ այս երկրում առաջանա նույն պատկերը, ինչ՝ Գազայում։ Էրբաքանը նաև հիշել է 1969 թ․ մեկնարկած «Ազգային տեսակետ» իսլամական գաղափարախոսությունն ու քաղաքական հոսանքը, որը վերստին յուրացվել է իր կուսակցության կողմից։ Էրբաքանը, Քոջաելի նահանգը «Ազգային տեսակետի և Նոր բարօրության ամրոց» որակելով, հայտնել է, որ իր կուսակցությունն առաջիկա ընտրություններին նպատակադրվել է ավելի մեծ հաջողություն գրանցել։ Նոր բարօրություն կուսակցության առաջնորդը մտահոգություն է արտահայտել տարածաշրջանում տեղի ունեցող զարգացումների առնչությամբ՝ հավելելով, որ Իրանից հետո հերթը կհասնի Թուրքիային։ Նա նաև հիշեցրել է իր հոր՝ Նեջմեթթին Էրբաքանի այն խոսքը, թե Իրաքից հետո կանցնեն մյուս երկրներին․ «Հայրս ասել էր՝ Իրաքից հետո հերթը կհասնի Լիբիային, Եգիպտոսին, Սիրիային և Իրանին, ամենավերջում էլ՝ Թուրքիային»։ Այսօր ամերիկացի նախկին բարձրաստիճան պաշտոնյաների հայտարարություններից էլ հասկանում ենք, որ Իրանից հետո թիրախի կվերածվի Թուրքիան»։
Տնտեսություն- Առաջիկայում կհրապարակվի Ժողովրդահանրապետական կուսակցության՝ տնտեսության զարգացման մասին նոր ճանապարհային քարտեզը
Ժողովրդահանրապետական (Cumhuriyeti Halk Partisi / CHP) կուսակցության՝ փետրվարի 23-ին տեղի ունեցած ժողովի ժամանակ հաղորդվել է, որ մարտի 2-ին նախատեսվող կուսակցական հանդիպմանը կհրապարակվի Թուրքիայի տնտեսության զարգացման մասին նոր ճանապարհային քարտեզը։ 18 կետերից բաղկացած կուսակցական խոստումներն ընդգրկող փաստաթուղթը կներկայացվի Ժողովրդահանրապետական կուսակցության առաջնորդ Օզգյուր Օզելի կողմից։ «Ժողովրդի հետ, ժողովրդի հրամանով» խորագրով կազմակերպվելիք այդ հանդիպման նախապատրաստական աշխատանքներն արդեն իսկ մեկնարկել են։ Նույն օրը հանրությանը կներկայացվեն նաև կուսակցության այն անդամների լուսանկարները, որոնք ընդգրկվելու են Ժողովրդահանրապետական կուսակցության կառավարության կազմում։
Հասարակություն- Թուրքիայի աշխատավորների իրավունքների արհմիությունը հայտարարել է, որ պահանջելու է վերանայել նվազագույն աշխատավարձի չափը
Փետրվարի 23-ին Թուրքիայի աշխատավորների իրավունքների արհմիության կազմակերպած իֆթարի շրջանակներում հայտարարություններ են հնչել Թուրքիայում աշխատանքային խնդիրների վերաբերյալ։ Արհմիության նախագահ Մահմուդ Արսլանը և անդամները պատասխանել են լրագրողների հարցերին։ Արսլանը հայտնել է, որ իրենց արհմիությունն այս տարի Մայիսի 1-ը նշելու է Բուրսայում՝ զանգվածային ցույցով։ Նա նաև ընդգծել է, որ գործատուների և Թուրքիայի կառավարության նախատեսած նվազագույն աշխատավարձի չափը շատ հեռու է իրենց պահանջած և ակնկալած աշխատավարձի չափից։ Մահմուդ Արսլանը Թուրքիայի կառավարությանը կոչ է արել վերանայել նվազագույն աշխատավարձը։
Փոքրամասնություններ- Ստամբուլում թուրք գրականության ուսուցիչը կարգապահական պատժի է ենթարկվել հայերին և ալևիներին գովելու համար
Ստամբուլում թուրքերեն լեզվի և գրականության ուսուցիչ Իսմիբեյ Գյուշելին կարգապահական պատժի է ենթարկվել ուսուցչանոց «Ակօս» շաբաթաթերթի և «Էվրենսել» պարբերականի համարներ բերելու, ինչպես նաև՝ գործընկերների հետ իր խոսակցությունների ժամանակ հայերի և ալևիների հասցեին գովեստի խոսքեր ասելու համար։ Գյուշելիին, որպես պատիժ, տեղափոխել են այլ դպրոց և պահումներ արել աշխատավարձից։ Թուրք ուսուցիչը դատարան է դիմել իր իրավունքները վերականգնելու համար։
Պատրաստեց Մելինե Անումյանը
Leave a Reply