Հայաստանի վարչապետը հավատացած է, որ շատ շուտով Հայաստանի և Թուրքիայի ցամաքային սահմանի բացման հարցում որևէ զարգացում կլինի։
«Արմենպրես»-ի փոխանցմամբ՝ Նիկոլ Փաշինյանն այդ մասին ասել է Լեհաստանի միջազգային հարաբերությունների ինստիտուտում Լեհաստանում օտարերկրյա դեսպանների, դիվանագետների և վերլուծական կենտրոնների ներկայացուցիչների հետ հանդիպման ժամանակ՝ պատասխանելով քննարկման մասնակիցներից մեկի հարցին Հայաստանի և Թուրքիայի միջև հարաբերությունների կարգավորման գործընթացի վերաբերյալ։
«Մենք շատ դրական երկխոսություն ունենք Թուրքիայի հետ, մենք մշտապես հանդիպումներ ենք ունենում, խորհրդակցություններ ենք ունենում, բայց, իհարկե, ամենակարևոր իրադարձությունը, որը հույս ունենք տեսնել, դիվանագիտական հարաբերությունների հաստատումն է Հայաստանի և Թուրքիայի միջև, և, ինչ խոսք, ցամաքային սահմանի բացումը։ Ինչո՞ւ եմ ես նշում հենց ցամաքային սահմանը, քանի որ օդային սահմանը բաց է, մենք Հայաստանից Թուրքիա կանոնավոր թռիչքներ ունենք։ Եվ իմ ակնկալիքն այն է, որ երկկողմ թռիչքների ծավալը կաճի, սակայն, ինչ խոսք, մենք հույս ունենք, որ ցամաքային սահմանը ևս կբացվի։ Ի դեպ, մեզ Թուրքիայի հետ սահմանին նոր ենթակառուցվածք պետք կգա, և մենք հիմա քննարկում ենք, թե ԵՄ-ն ինչպես կարող է աջակցել այս հարցում։ Գործընթացը ծավալվում է, և ես հավատացած եմ, շատ շուտով ինչ-որ բան կտեսնենք»,- ասել է Փաշինյանը։
Նա հավելել է, որ տպավորություն ունի, որ կա ընդհանուր պատկերացում, որ սահմանի բացումը պետք է տեղի ունենա, սակայն դա կախված է Թուրքիայի որոշումից։
«Հայկական կողմից որևէ խոչընդոտ չկա, մենք պատրաստ ենք ցանկացած պահի անել դա։ Վերջին ամիսներին մենք մի քանի անգամ հայտարարել ենք, որ մենք պատրաստ ենք նաև ուղի տրամադրել Թուրքիայից Ադրբեջան և Ադրբեջանից Թուրքիա ուղևորվող բեռնատարների համար։ Ենթակառուցվածքը դրան ամբողջովին պատրաստ է, և մենք սպասում ենք Թուրքիայի որոշմանը»,- ընդգծել է Նիկոլ Փաշինյանը։
Leave a Reply