«Փառք Աստծո, տեսնում ենք, որ «Զանգեզուրի միջանցքի» կյանքի կոչվելը նաեւ Ադրբեջանի ուզածով է լինում, քանի որ ինչպես ասել ենք, այն կարեւոր է «Միջին միջանցքի» համար»,–ասել է Թուրքիայի ԱԳ նախարար Հաքան Ֆիդանը։
Թուրքական Anadolu–ի փոխանցմամբ՝ Թուրքիայի ԱԳ նախարարը շեշտել է` թե ռազմավարական տեսանկյունից, թե տարածաշրջանի ձեւաչափով Նախիջեւանի եւ Ադրբեջանի միջեւ ցամաքով միանալը կարեւոր է։
Ֆիդանը նշել է, որ Հայաստանի ԱԳ նախարար Արարատ Միրզոյանի՝ Վաշինգտոն այցի ընթացքում քննարկված «Թրամփի ուղին» (TRIPP) կյանքի կոչելու ԱՄՆ–ի եւ Հայաստանի միջեւ համաձայնագիրը Թուրքիան եւ Ադրբեջանը եւս ուսումնասիրել են։ «Դա մեր ասած Զանգեզուրի միջանցքն է։ Կան մի քանի տեխնիկական հարցեր։ Երեկ իմ հարգարժան գործընկեր Ջեյհուն Բայրամովի հետ մոտ 2 ժամ զրուցել ենք այդ թեմայով։ Մեր նախագահին եւս տեղեկություններ են հայտնել»,–ասել է Ֆիդանը։
Գործընթացից Թուրքիայի սպասելիքների հետ կապված, Թուրքիայի ԱԳ նախարարն ասել է, թե Հայաստանի եւ Ադրբեջանի միջեւ այդ համաձայնությունը ստորագրության միջոցով վերջնական տեսքի բերելուց հետո, Հայաստան–Թուրքիա հարաբերությունների կարգավորումը վայրկյան առաջ կյանքի կոչելով՝ տարածաշրջանում կայունությամբ եւ բարգավաճմամբ պետք է առաջ շարժվել։
Հաքան Ֆիդանը, անդրադառնալով Հայաստանի առաջիկա ընտրություններին՝ նշել է. «2026–ի հունիսին Հայաստանում ընտրություններ են լինելու, որոնք այս գործընթացի մի կարեւոր հատվածն են լինելու։ Մենք տեսնում ենք, որ հասարակության մեջ սոցհարցումներով Փաշինյանը առաջատար է։ Այս հարցում աջակցում են նրա կառուցողական դերակատարությունը։ Անհրաժեշտ է, որ այդ գիծը, այս կամքը շարունակվի»։
Leave a Reply