Նյու Յորքում տեղի է ունեցել Պոլսո Հայոց պատրիարքարանի պատմության մասին պատմող բացառիկ ֆիլմի անգլերեն տարբերակի ցուցադրությունը

Նյու Յորքում տեղի է ունեցել «Ինքնության արահետ. Պոլսո Պատրիարքական Աթոռը ժամանակների մեջ» խորագրով ֆիլմի անգլերեն տարբերակի անդրանիկ ցուցադրությունը։ Ինչպես հաղորդում է «Արմենպրես»-ը, ֆիլմի հեղինակներն են Ստամբուլի հայկական «Ժամանակ» օրաթերթի գլխավոր խմբագիր Արա Գոչունյանը և վավերագրող, հրապարակախոս, «Ֆակտում» փաստագրական կենտրոնի ղեկավար Տիգրան Պասկևիչյանը։  

Ֆիլմը պատմաբանների, հոգևորականների, իրավաբանների ու այլ մասնագետների ներգրավմամբ պատմում է 1461 թվականին հիմնադրված Պոլսո Պատրիարքական Աթոռի պատմությունը՝ հիմնադրումից մինչև մեր օրեր։ Ֆիլմում ներկայացված են պատրիարքարանի պատմության կարևորագույն ու առանցքային շրջանները՝ գալով մինչև մեր օրեր ու խոսելով արդեն պատրիարքարանի մեր օրերի կարևորագույն խնդրի՝ Թուրքիայում իրավական կարգավիճակի բացակայության մասին։ 

Հայաստանյայց Առաքելական եկեղեցու Հյուսիսային Ամերիկայի Արևելյան թեմի և Հայկական բարեգործական ընդհանուր միության համատեղ նախաձեռնությամբ ֆիլմի պրեմիերան տեղի է ունեցել Նյու Յորքի առաջնորդարանի սրահներից մեկում։ 

Ներկա է գտնվել ՄԱԿ-ում Հայաստանի մշտական ներկայացուցիչ Պարույր Հովհաննիսյանը։

Ֆիլմը նվիրված է «Ժամանակ» օրաթերթի երջանկահիշատակ գլխավոր խմբագիր Մարտիրոս Գոչունյանի մահվան 50-րդ տարելիցին։ Այս առումով շատ հատկանշական է, որ ցուցադրությանը ներկա է եղել նաև նրա թոռնուհին՝ Մոնա Խորոզյանը։

Ֆիլմի ցուցադրությունից հետո «Ժամանակ» օրաթերթի գլխավոր խմբագիր Արա Գոչունյանը պատասխանել է ներկաների հարցերին։

2025 թվականի հոկտեմբերի 11-ին ֆիլմի հայերեն տարբերակի անդրանիկ ցուցադրությունը տեղի էր ունեցել Ստամբուլում։ 

https://armenpress.am/hy/article/1235852