Հայաստանը պատրաստակամ է հենց այսօրվանից Մարգարայից Կոռնիձոր երթուղով ապահովել Ադրբեջանից Թուրքիա և Թուրքիայից Ադրբեջան բեռների տարանցումը:
«Արմենպրես»-ի փոխանցմամբ՝ Հայաստանի պատրաստակամությունը վերահաստատեց ՀՀ վարչապետ Նիկոլ Փաշինյանը Կառավարության նոյեմբերի 6-ի նիստում:
Վարչապետը հիշեցրեց, որ այսօր ՌԴ-Ադրբեջան-Վրաստան-Հայաստան երկաթուղային երթուղով ՀՀ է մուտք գործել հացահատիկի առաջին խմբաքանակը:
Վարչապետը սա որակեց որպես կարևոր ու պատմական իրադարձություն: Այժմ սպասվում է ցորենի նոր խմբաքանակ Ղազախստանից՝ կրկին Ադրբեջանի տարածքով:
«Սա նաև կարևոր մի հանգրվան է Վաշինգտոնում ձեռք բերված պայմանավորվածությունների և Վաշինգտոնի հռչակագրի կետերի իրագործման առումով: Եվս մեկ անգամ վերահաստատում եմ Հայաստանի պատրաստակամությունը հենց այսօրվանից ապահովել բեռների տեղափոխումն Ադրբեջանից Թուրքիա և Թուրքիայից Ադրբեջան՝ Մարգարայից դեպի Կոռնիձոր երթուղով: Կես ժամից էլ բեռնատար մոտենա անցակետին՝ թե՛ Կոռնիձորի կողմից, թե՛ Մարգարայի կողմից, մենք պատրաստ ենք անցումը սպասարկել»,-ասաց Փաշինյանը:
Ավելի վաղ Ադրբեջանի նախագահ Իլհամ Ալիևը հայտարարել էր, որ Ադրբեջանը հանել է իր տարածքով դեպի Հայաստան բեռների տարանցման բոլոր սահմանափակումները՝ հայտնելով, որ Ղազախստանից Ադրբեջանի տարածքով ցորենի առաջին խմբաքանակը կուղարկվի Հայաստան։ Ալիևի այս հայտարարությունը ողջունել էր ՀՀ վարչապետ Նիկոլ Փաշինյանը՝ իր հերթին հայտնելով, որ Հայաստանն էլ իր հերթին հանում է բոլոր սահմանափակումները իր տարածքով դեպի Ադրբեջան և Թուրքիա բեռնարի տարանցման համար։
Նոյեմբերի 6-ի գիշերը Հայաստան էր հասել շուրջ 1000 տոննա ցորենի խմբաքանակը, որն Ադրբեջանի տարածքով ուղարկվել էր Ռուսաստանի կողմից։ Ռուսաստանն արդեն իսկ հայտարարել է, որ առաջիկայում ևս 132 վագոն ցորենի խմբաքանակ կարտահանի Հայաստան՝ Ադրբեջանի տարածքով։
Leave a Reply