Ի՞նչ թեմաներ է Արսեն Թորոսյան քննարկել թուրք նախարարի հետ

Ես, անկեղծ ասած, չեմ հասկանում ինչ է նշանակում՝ հակահայ կամ ոչ հակահայ, մենք հանդիպել ենք ուրիշ երկրի նախարարի հետ և ես չեմ որոշում, այդ նախարարները ովքեր են։ Այս մասին այսօր՝ հոկտեմբերի 1–ին, լրագրողների հետ զրույցում նշեց աշխատանքի և սոցիալական հարցերի նախարար Արսեն Թորոսյանը անդրադառնալով նրան, որ նախօրեին ինքը Սերբիայի մայրաքաղաք Բելգրադում անցկացվող RISE 2025 համաժողովի շրջանակում հանդիպել է Թուրքիայի ընտանիքի և սոցիալական ծառայությունների նախարար Մահինուր Օզդեմիր Գյոքթաշի հետ, որը հայտնի է իր հակահայ դիրքորոշումներով։

«Հաշվի առնելով մեր նաև նորմալացման գործընթացը Հայաստանի և Թուրքիայի միջև, մեր շատ պաշտոնյաներ իրար հետ շփվում են, տարբեր նախարարություններ, մենք նույնպես սկսել ենք շփումները, որոնք միգուցե հետագայում ինչ-որ արդյունք տան։

Սա առաջին հանդիպում է եղել, ըստ էության, քաղաքավարական, եթե կլինեն արդեն բովանդակային թեմաներ, այդ թվում, որոնք կարող են օգնել մեր քաղաքացիներին, Թուրքիայում, ինչ-որ հարցերում օգտակար լինելուն, դրանցով կզբաղվենք։

Դիտարկմանը, որ ինքը հանդիպել է մի մարդու հետ, ով ժխտում է Հայոց ցեղասպանությունը, Թորոսյանն արձագանքեց. «Իսկ ո՞վ չի ժխտում Թուրքիայում ցեղասպանությունը։ Կարո՞ղ եք ցանկ տալ, նրանց հետ միայն հանդիպել։

Մենք չենք որոշում ում հետ հանդիպենք մենք չենք որոշում այդ պաշտոնյաներին և ես կարծում եմ որ մեր նորմալացման գործընթացի շրջանակներում շատ պաշտոնյաների հետ անհրաժեշտ է շփվել նաև մեր շահերի ձեռներով, և դրան պետք է նայել այդ լույսի ներքո»։

https://news.am/arm/news/907457.html