Ֆրանսացի յայտնի ցեղասպանագէտ Իվ Թեռնոն պարգեւատրուեցաւ Հայոց ցեղասպանութեան թանգարան-հիմնարկի «Ռաֆայէլ Լեմքին» յուշամետալով

Հայոց ցեղասպանութեան թանգարան-հիմնարկի տնօրէն Էդիտա Գզոյեան Հայոց ցեղասպանութեան ուսումնասիրութեան բնագաւառին մէջ նշանակալի աւանդին եւ խորքային հետազօտութիւններուն համար ֆրանսացի նշանաւոր ցեղասպանագէտ Իվ Թեռնոնը պարգեւատրեց Հայոց ցեղասպանութեան թանգարան-հիմնարկի «Ռաֆայէլ Լեմքին» յուշամետալով:

Պարգեւատրումը տեղի ունեցաւ սեպտեմբեր 24-26 Երեւանի մէջ կայացած «Քննարկելով «այլեւս երբեք»-ը. Ողջակիզումը եւ զանգուածային ոճրագործութիւնները» («Interrogating the Never Again the Holocaust and Mass Atrocities») խորագիրով միջազգային դասընթացքի ծիրին մէջ, որ կազմակերպած էին Երեւանի պետական համալսարանը, Հայաստանի մէջ Ֆրանսայի եւ Գերմանիոյ դեսպանատուները, ինչպէս նաեւ` Փարիզի «Շոա» յուշահամալիրը:

Սեմինարին երկրորդ օրը սեմինարը ամբողջութեամբ կայացուեցաւ Հայոց ցեղասպանութեան թանգարան-հիմնարկին մէջ, օրուան նիւթ ունենալով` Հայոց ցեղասպանութեան եւ Արցախի հարցերու ուսումնասիրութիւնը: Այդ օրը բանախօսութեամբ հանդէս եկաւ Հայոց ցեղասպանութեան թանգարան-հիմնարկի Վ. Տատրեանի անուան համեմատական ցեղասպանագիտութեան բաժինի վարիչ Սուրէն Մանուկեանը, որ ներկայացուց «Մարդկայնօրէն ինչպէ՞ս կարելի է. Ցեղասպանութիւն հայերու նկատմամբ» նիւթը:

Երկրորդ բանախօս Էլոտի Կաւրիլոֆը ներկայացուց «Արցախի ցեղային զտում» խորագիրով դասախօսութիւնը:

Աւարտին տեղի ունեցաւ «Հայոց ցեղասպանութեան յուշահամալիր» խորագիրով կլոր սեղան-քննարկում, որուն մասնակցեցան` յայտնի ֆրանսացի ցեղասպանագէտ Իվ Թեռնոնը, Հայոց ցեղասպանութեան թանգարան-հիմնարկի տնօրէն Էդիտա Գզոյեանը եւ Հայոց ցեղասպանութեան թանգարան-հիմնարկի Արցախի, Նախիջեւանի եւ Ազրպէյճանի հայաբնակ շրջաններու մէջ հայութեան բռնաճնշումներու ուսումնասիրութեան բաժինի վարիչ Յարութիւն Մարութեանը: