Թուրքիայի «Աքքույու» ատոմակայանի աշխատակիցները գործադուլ են հայտարարել աշխատավարձի չվճարման պատճառով

Թուրքիայի հարավային Մերսին քաղաքում կառուցվող «Աքքույու» ատոմակայանի շինհրապարակում ենթակապալառուի վարձած աշխատողները այսօր դադարեցրել են աշխատանքը՝ պատճառաբանելով վերջին երեք ամիսների ընթացքում աշխատավարձի չվճարումը, հաղորդում է Bianet-ը։

Ատոմակայանը կառուցում է ռուսական պետական էներգետիկ ընկերությունը՝ «Росатом»-ը։ Գործադուլավորների թվում կային ինչպես Թուրքիայի, այնպես էլ Ռուսաստանի քաղաքացիներ։

Բողոքի ակցիայի ժամանակ աշխատողները փորձել են երթով շարժվել դեպի վարչական շենք՝ վանկարկելով կարգախոսներ, սակայն նրանց երթն արգելափակել է ժանդարմերիան։

Ըստ թուրքական Haberci պարբերականի՝ ժանդարմերիան կոպիտ կերպով միջամտել է՝ աշխատողների դեմ ջրցան մեքենաներ օգտագործելով։ Սա առաջին դեպքը չէ, որ «Աքքույու»-ի աշխատողները բողոքի ցույցեր են կազմակերպում վատ աշխատանքային պայմանների և աշխատավարձին առնչվող խնդիրների պատճառով։

Նախորդ ցույցերը նույնպես ուղեկցվել են իրավապահ մարմինների կողմից ուժի կիրառմամբ։ Առաջադեմ արհմիությունների կոնֆեդերացիային (DISK) առընթեր Հեղափոխական շինարարության և ճանապարհաշինության աշխատողների միությունը (Dev Yapı-Iş) հայտարարություն է տարածել, որով դատապարտում է ժանդարմերիայի գործողությունները։

«Մերսին «Աքքույու» ատոմակայանի տարածքում շինարարական աշխատողները, որոնք բողոքում էին վատ աշխատանքային պայմանների և վերջին երեք ամիսների ընթացքում աշխատավարձերի չվճարման դեմ, ենթարկվել են ժանդարմերիայի հարձակմանը՝ օգտագործելով արցունքաբեր գազ, մահակներ և ջրցան մեքենաներ, երբ նրանք փորձել են երթով շարժվել դեպի ընկերության գրասենյակներ»,- ասված է հայտարարության մեջ։

Նշվում է, որ չնայած պետական կառույցները լռում են գործատուների կողմից աշխատավարձի գողության մասին, նրանք արձագանքում են ոստիկանության և ժանդարմերիայի օգնությամբ, երբ աշխատողները պահանջում են իրենց իրավունքները պահպանումը։

Ըստ Sota News-ի՝ աշխատավարձի չվճարման հիմնական պատճառը ենթակապալառու TSM Enerji-ն է։ Ռուսաստանցի աշխատողներին հավաքագրում են ռուսական «Титан -2» ընկերության միջոցով, սակայն Թուրքիայում նրանք առանձին աշխատանքային պայմանագրեր են կնքում TSM Enerji-ի հետ։ «Росатом»-ը պաշտոնապես հեռացվել է այս համաձայնագրից։

TSM Enerji-ն հուլիսի 22-ի փաստաթղթում նշել է, որ ընկերությունը բավարար միջոցներ չունի Թուրքիայի սոցիալական ապահովագրության հաստատությանը (SGK) 58 միլիոն դոլարի պարտքը մարելու համար։ Արդյունքում, ըստ տեղեկությունների, ընկերությանը սպառնում է ակտիվների բռնագրավվում և գործունեության դադարեցում։

https://news.am/arm/news/895891.html